Пасля выбараў СК распачаў больш за 5 тысяч крымінальных спраў "за пратэсты"
Толькі па "карагоднай" справе ў Брэсце праходзяць 129 чалавек / скрыншот відэа
З 9 жніўня 2020 года Следчы камітэт Беларусі распачаў больш за 5 тысяч крымінальных спраў, звязаных з пратэстамі, заявіў у інтэрв'ю БЕЛТА першы намеснік старшыні Следчага камітэта Алег Шандаровіч.
"Летась такіх злачынстваў было каля 1,7 тысячы, за дзевяць месяцаў гэтага — каля 3,3 тысячы", — удакладніў ён.
Каля 40% з агульнай колькасці "пратэсных" спраў распачатыя за паклёп і абразы службовых асоб. Яшчэ 25% — гэта справы па фактах апаганьвання збудаванняў і псавання маёмасці.
Шандаровіч расказаў, што ў цяперашні час па 2 тысячах "пратэсных" спраў расследаванне ўжо завершанае. Асобна ён спыніўся на "карагоднай" справе ў Брэсце. Па яго словах, фігурантамі гэтай справы былі 129 чалавек. У дачыненні да 104 расследаванне ўжо скончанае, матэрыялы перададзеныя пракурору.
Нагадаем, 13 верасня 2020 года ў Брэсце ўдзельнікі акцыі выйшлі на скрыжаванне, дзе спявалі песні і вадзілі карагоды. Іх разганялі вадамётам, затым пачалі затрыманні.
