“Пакуль Расія ці ЕС даюць грошы, Беларусь не будзе выконваць абавязкаў”

Беларусь не зацікаўленая праграмай “Дыялог па мадэрнізацыі”, якая была ініцыявана Еўрасаюзам паўгода таму. Такія высновы можна зрабіць са словаў амбасадара Беларусі ў Бельгіі Андрэя Еўдачэнкі. Паводле амбасадара, Мінск мае да Бруселя шэраг прэтэнзій:

“Еўрасаюз парушыў умовы па сумеснай з Беларуссю падрыхтоўцы праграмы. Другім пунктам было тое, што праграма будзе накіравана на органы дзяржкіравання Беларусі і на ўсё беларускае грамадства. Ніводная з гэтых умоў не была выканана Еўрасаюзам”.

Пасля падзей 19 снежня 2010 года фактычна замарожаным аказаўся і ўдзел Беларусі ва “Усходнім Партнёрстве”. Таксама Беларусь не была ўключаная ў працы парламенцкай асамблеі усходняга партнёрства “Еўранэст”.

Беларускім уладам не патрэбны дыялог з Еўропай, але і еўрапейскія палітыкі больш імкнуцца захаваць свой твар, чым развіваць двухбаковыя адносіны, сцвярджае эксперт Цэнтра Усходніх даследаванняў Каміль Клысінскі.

Каміль Клысінскі: “Я схіляюся да вываду, што на дадзены момант Лукашэнка не зацікаўлены ў тым, каб дамовіцца з Захадам ці ўзнавіць дыялог. Ён ведае, што не зможа выканаць патрабаванні ЕС. Ён стараецца не эскалаваць канфлікт, каб не пагражаць экспарту нафтапрадуктаў, які з’яўляецца галоўным у адносінах Мінска з ЕС”.

Падтрымкай беларускага рэжыму з боку Крамля дае беларускім уладам магчымасць карыстацца расійскімі грашыма, і нічога не даваць узамен, лічыць Валерыя Касцюгова з мінскага Агенцтва палітычнай экспертызы.

Валерыя Касцюгова: “Зараз Расія выставіла максімум патрабаванняў, якія Беларусь узялася выконваць. Але калі ўзгадаць кантэкст, у 2001-м годзе новы расійскі ўрад прывёз пакет папер, якія Беларусь падпісала і пад якія атрымала шмат крэдытаў. Прайшоў час, аказалася, што фактычна ніякія з абавязкаў не выконваюцца. Бо пакуль рускія даюць грошы, зусім не абавязкова выконваць абавязкі. Грошы ці абавязкі. Тое ж самае датычыцца і стасункаў з Еўропай”.

Сапраўды, усходні сусед Беларусі не патрабуе вызвалення палітвязняў і не ўздымае тэму дэмакратыі, як гэта робіць Еўрасаюз. Тым не менш пазітыўныя эканамічныя рэформы могуць прыйсці як раз з Расіі, якая нядаўна ўступіла ў СГА, кажа Валерыя Касцюгова:

“Зменяцца часткова мытныя тарыфы, зменяцца ўмовы на расійскім рынку. І гэта прымусіць мяняць эканамічную палітыку. Бо папярэднія фінансавыя схемы перастануць працаваць”.

Аднак эксперт адзначае, што эканамічныя і палітычныя змены не заўсёды звязаныя, таму палітычная сітуацыя, у адрозненне ад эканомікі, можа наадварот пагоршыцца.