Пад Віцебскам людзі пратэстуюць супраць зносу сваіх лецішчаў

Пад Віцебскам людзі пратэстуюць супраць зносу сваіх лецішчаў, якія знаходзяцца на ўзбярэжжы Заходняй Дзвіны. Побач плануюць узвесці гідраэлектрастанцыю, і на думку мясцовых уладаў, дамы апынуцца ў зоне падтаплення.

Аднак у садаводчым таварыстве “Суднабудаўнік” ёсць спецыялісты, якія шмат гадоў адпрацавалі ў Віцебскім рачным порце. Яны сцвярджаюць, што ўзровень вады да іх жылля не дастане. Сумненні ў дачнікаў узніклі пасля таго, як яны даведаліся, што пад знос трапляюць не ўсе дамы, а толькі іх частка. Прычым кампенсацыі жыхарам абяцаюць выплаціць немалыя. Таму яны падазраюць, што на іх участках хочуць пабудаваць, напрыклад, базу адпачынку.

Аркадзь Шлыкаў, які адпрацаваў 35 гадоў рачніком, лічыць, што яго лецішча пад затапленне не падпадае, але тым не менш яго дом таксама плануюць знесці:

"Пра знос я даведаўся ў лютым ад старшыні нашага кааператыва. І ўсё на гэтым. А вясной ужо запрасілі на сход начальніка будаўніцтва Івана Іванавіча Пугачова. Ён прыйшоў з задавальненнем і нам па гэтай справе сказаў: “Зносім”. Але зносіцца дом, а гараж не будуць чапаць. Я кажу, як так, дом зносіцца, а гараж пакідаецца? Ну, будзем глядзець, можа, і дом пакінем".

Уладальнікі лецішчаў не выступаюць супраць будаўніцтва гідраэлектрастанцыі, яны за тое, каб да ўсіх ставіліся справядліва. Людзі яшчэ выказваюць трывогу за тое, што станцыю будуць узводзіць рабочыя з Кітая. Гаворыць дачнік Аляксандр:

"Яны цяпер выконваюць план па адсяленні. Грошы выбітыя. Кітайцам на 29 гадоў у кабалу, зноў кітайцы прывезлі ржавае жалеза. Праз 29 гадоў можа здарыцца так, што гэта ўсё зносіцца, і зноў кітайскі звязаны крэдыт на наступныя машыны. Вось не трэба ісці ў кабалу да кітайцаў".

Суседка Аляксандра таксама не згодная на кампенсацыю. Яна жыве адна, муж памёр, і новае лецішча ўзвесці яна не зможа нават за вялікія грошы. Ды і прызвычаілася яна да гэтых мясцін, кажа жанчына:

"Я не ведаю, мне не трэба грошы. Мне хапае, я інвалід першай групы. У мяне вось паглядзіце колькі берага, 40 метраў у мяне".

Уладальнікі лецішчаў атрымалі афіцыйнае папярэджанне, што зносіць іх дамы будуць увосень. І яны звяртаюцца ва ўсе сродкі масавай інфармацыі, каб прыцягнуць увагу да сваёй праблемы.

Пакуль што мясцовыя ўлады вырашылі правесці экспертызу і пасля яе прыняць канчатковае рашэнне.

Нагадаем, Віцебская ГЭС будуецца за 9 кіламетраў ад абласнога цэнтра, вышэй па цячэнні Заходняй Дзвіны. Чакаецца, што яна стане адным з найбуйнейшых гідравузлоў у краіне.

Фота: svaboda.org

Спецыяльна для праграмы Кардыяграма