Навошта беларусы звяртаюцца па “тэлефонах даверу”?

Еўрарадыё высвятляла ў Памежным камітэце, Камітэце дзяржкантролю і Міністэрстве ЖКГ на што беларусы скардзяцца?

“Нявыплата заробкаў. Бывае, і пра махлярства расказваюць — мы гэта ўсё ў МУС накіроўваем. У асноўным, што нехта абяцаў адзін заробак, а падмануў, заплаціў іншы. Шмат расказваюць пра няякасныя тавары. Такія паведамленні атрымліваем”, — расказваюць мне ў Камітэце дзяржкантролю.

Мой суразмоўца з іншага боку слухаўкі тэлефона даверу КДК прызнаецца, што большасць тэлефанаванняў даводзіцца перанакіроўваць. Людзі чамусьці лічаць Камітэт дзяржкантролю самай адказнай і сур’ёзнай інстанцыяй. Званкоў, якімі можа заняцца КДК, у дзень бывае некалькі. Там адрэагуюць на паведамленні пра нявыплачаныя падаткі альбо пра незаконную прадпрымальніцкую дзейнасць. Усе паведамленні акуратна фіксуюцца, адказ прыходзіць праз 10 дзён. Максімум — праз 15.

Датэлефанавацца на гарачую лінію Памежнага камітэта складаней — некалькі разоў чую толькі кароткія гудкі. А калі дазвоньваюся, то чую, што беларусы ў памежны камітэт звяртаюцца амаль бесперапынна. Збольшага цікавяцца тым, што трэба для паспяховага перасячэння мяжы.

“Нават не скардзяцца, а кансультуюцца. Пытаюцца аб працэдурах выезду за мяжу з дзецьмі. Вельмі шмат такіх пытанняў. Часта тэлефануюць з мяжы, калі чарга”.

Беларусы сюды звоняць з прэтэнзіямі да маруднай, на іх думку, працы памежнікаў. Аператарам даводзіцца тлумачыць, чаму мяжу ў дадзены момант можна праехаць толькі за гадзіну ці дзве, а не за 15 хвілін. “Расказваем, што адбываецца на іншых пунктах пропуска. Дзе чэргі меншыя”, — кажуць на гарачай лініі памежнікаў. Таксама памежнікам часта тэлефануюць людзі, якія насамрэч маюць прэтэнзіі да мытнікаў.

Не менш за гарачую лінію Памежнага камітэта папулярныя тэлефоны Міністэрства ЖКГ. Сяргей Чаплінскі з мінскага аддзялення расказвае, што прымаюць па 45-60 разоў на дзень.

“Як часта звоняць? У дзень каля 45-60 тэлефанаванняў. Адказваем альбо адразу, альбо чалавека накіроўваем па тым альбо іншым адрасе”.

Больш за ўсё людзей турбуюць пытанні аплаты камунальных паслуг, рамонт пад’ездаў ды іншыя камунальныя рэчы. І скаргі на хатніх гадаванцаў — суседскіх сабак і катоў. Званіць можна кожны будні дзень з 9-ці да 15-ці гадзін. Адказ на кожны званок дашлюць пісьмова праз тыдзень-два.

З усіх установаў дазваніцца не атрымалася толькі на тэлефон даверу… Міністэрства па падатках і зборах. Дазваніцца ў МУС таксама праблематычна — часта бывае занята. Расказваць пра колькасць званкоў там не сталі. Прычына такой сакрэтнасці простая — па тэлефоне даверу МУС прымаюць паведамленні пра несумленных міліцыянтаў.