МУС: Новыя легальныя наркотыкі з'яўляюцца ўвесь час
З пачатку года спіс забароненых "спайсаў" пашырыўся да 48 найменняў, а на лаву падсудных за іх трапілі 3 чалавекі. Пра тое, як у Беларусі змагаюцца з курыльнымі
"Спайсы" забаранялі ў Беларусі ўжо тры разы. Першы — 31 ліпеня
2009 года: тады ў спіс унеслі толькі два псіхатропныя рэчывы, а калі ён
набыў моц 1 студзеня 2010 года, з'явіліся іншыя курыльныя сумесі — з
новымі, ужо легальнымі, рэчывамі. Таму давялося папаўняць спіс яшчэ два
разы. 28 сакавіка года туды занеслі яшчэ 25 рэчываў, а 20 жніўня — яшчэ
21. Пра гэта ў інтэрв'ю Еўрарадыё распавёў супрацоўнік упраўлення па
наркакантролі і супрацьдзеянні гандлю людзьмі МУС Сяргей Сідаровіч. Паводле яго словаў, попыт на такую прадукцыю вялікі, таму пастаянна з'яўляюцца новыя легальныя наркотыкі.
Сяргей Сідаровіч: "Навука
не стаіць на месцы. На сёння мы ўнеслі ў спіс тое, што ведаем, але
заўтра адназначна будуць з'яўляцца новыя сінтэтычныя канабіноіды, якіх
няма ў спісе. Людзі не хочуць патрапляць пад адказнасць, легальныя
наркотыкі карыстаюцца попытам, таму будуць шукаць шчыліны і прывозіць
новыя, якіх няма ў спісе. Але мы не спыняемся на гэтым, і пры выяўленні
будзем уносіць болей. Сінтэтычных канабіноідаў у тэорыі сотні, а ў нас у
спісе — 48. Пашыраць спіс да сотняў няма сэнсу. Мы трымаем руку на
пульсе, і тое, што будзе з'яўляцца, мы будзем заносіць".
Фактычна
прадаўцы "спайсу" маюць магчымасць сыходзіць ад закону, пакуль новыя
віды псіхатропаў не занеслі ў спіс. Але яны падпадаюць пад
адміністратыўную адказнасць за нелегальную прадпрымальніцкую дзейнасць.
Апошнім
часам з'явіліся зусім новыя наркотыкі, так званыя солі для ваннаў — па
сутнасці, легальны аналаг какаіну альбо амфетаміну.
Сяргей Сідаровіч: "Гэта
ўжо досыць новы від — парашок. Мы яго адносім да новых наркотыкаў.
Актыўнае дзеючае рэчыва — параметылафедрон. Парашок пачаў з'яўляцца ў
студзені. Моцны стымулятар. Эфект падобны да какаіну ці амфетаміну. У
краінах-удзельніцах Інтэрпола сталі больш частымі атручванні, ёсць
смяротныя выпадкі".
Цяпер парашок
"Крысталіус" і ягоныя аналагі ўключылі ў спіс забароненых у Беларусі,
але на сайтах ужо з'явіліся новыя наркотыкі. Як кажуць прадаўцы, яшчэ
больш моцныя і не забароненыя ў Беларусі.
З большага ўжывае такія наркотыкі моладзь.
Сяргей Сідаровіч: "У
асноўным, новыя наркотыкі распаўсюджваюцца ў моладзевым асяродку, бо
рэкламуюцца толькі праз інтэрнэт. Залежныя людзі, хворыя, яны ўжываюць
тое, што і раней. У асноўным, легальныя наркотыкі распаўсюджваюцца ў
буйных гарадах, больш за ўсё ў Мінску і Гомелі".
Што
праўда, набыць легальныя наркотыкі стала больш складана. Яшчэ ўвесну
было мноства сайтаў, якія прапаноўвалі курыльныя сумесі. Цяпер жа
карэспандэнту Еўрарадыё знайсці наркотыкі праз інтэрнэт не ўдалося.
Большасць тэлефонаў адключаныя, а астатнія кажуць, што мы памыліліся
нумарам.
Сяргей Сідаровіч: "Мы
такімі захадамі збілі жаданне людзей, якія хацелі зарабляць грошы. За 8
месяцаў гэтага года канфіскавана 8 кілаграмаў "спайсаў" у суме.
Напрыклад, за той жа перыяд мы канфіскавалі 7 кілаграм амфетаміну і
амаль 80 кілаграм марыхуаны".
Дарэчы, 8
кілаграм спайсаў канфіскавалі ўжо пасля таго, як яны трапілі пад
забарону. Дагэтуль міліцыянерам трапляліся "гандляры" з партыямі ў 15
кілаграм. Але пакараць іх можна было толькі за незаконную
прадпрымальніцкую дзейнасць.
Сёння, нягледзячы
на вялікую колькасць крымінальных справаў, па "спайсах" вынесена толькі
тры прысуды. Адзін з іх, самы жорсткі, шырока вядомы: мінскага студэнта асудзілі на 8 гадоў за продаж курыльных сумесяў.
Сяргей Сідаровіч: "А
вось за захоўванне ёсць яшчэ два прысуды, і там атрымалі невялікія
тэрміны пакарання. Прычым не звязаныя з пазбаўленнем свабоды — а толькі з
абмежаваннем волі".
Сяргей Сідаровіч
мяркуе: прысудаў так мала, бо суддзі не спяшаюцца з ацэнкай і намагаюцца
больш дэталёва разглядаць такія новыя для Беларусі справы.
Сяргей Сідаровіч: "Гэтае
пытанне трэба больш суддзям задаваць. Але я думаю, што не спяшаюцца з
вынясеннем прысудаў, бо гэта ўсё вельмі новае, і калі прысуды пойдуць,
адваротнага шляху ўжо не будзе. Аднак я ўпэўнены, што па ўсіх
крымінальных справах прысуды будуць вынесеныя".
За
незаконны абарот псіхатропных рэчываў 328-ы артыкул Крымінальнага
кодэкса прадугледжвае пакаранне ад абмежавання волі да пазбаўлення
свабоды тэрмінам да 15 гадоў. Аднак той, хто сам здаў наркотыкі і
дапамагаў следству, вызваляецца ад адказнасці. Праўда, пакуль што ў
Беларусі такіх выпадкаў не было.
Як змагацца з наркотыкамі, Еўрарадыё пацікавілася ў жыхароў Мінска: