Вы тут

Мсціслаўскі хэпі-энд: як збітыя ў РАУС рабацягі ўпяклі міліцыянера на 3 гады

Урачыстасці з нагоды Дня ўшанавання ветэранаў органаў унутраных спраў і ўнутраных войскаў / упраўленне ўнутраных спраў Магілёўскага аблвыканкама

Усяго праз два дні пасля таго, як Аляксандр Лукашэнка зладзіў паказальны разнос працы сілавікоў, у Горацкім судзе вынеслі прысуд малодшаму лейтэнанту міліцыі Мікалаю Раеву. За перавышэнне службовых паўнамоцтваў ён атрымаў тры гады калоніі. Міліцыянер абскардзіў прысуд.

Што прывяло міліцыянера на лаву падсудных? Беларускія сілавыя ведамствы рэдка расказваюць СМІ пра здарэнні, звязаныя з іх супрацоўнікамі. Іншая рэч — калі пацярпелыя ад дзеянняў міліцыі прыходзяць да журналістаў самі. Так мы даведаліся, што малодшага лейтэнанта Раева судзілі за падзеі амаль гадавой даўнасці. У лістападзе 2018 года ў будынку Мсціслаўскага РАУС ён збіў двух затрыманых: Аляксея Швядкова і Мікалая Купчына. Апошняму ён так пашкодзіў нагу, што прыйшлося накласці гіпс.

Проста так пашпарт не выдаюць

16 лістапада 2018 года, Мсціслаў. Двое сяброў — Аляксей Швядкоў і Мікалай Купчын — прыйшлі ў пашпартны стол. Абодва былі нападпітку, але ісці прыйшлося, таму што Мікалаю патрэбны быў новы пашпарт:

"Я стары страціў. Наш касяк быў толькі ў тым, што мы былі нападпітку, — расказвае Купчын. — Нам пачалі тлумачыць, што так проста пашпарт не выдаюць, патрэбныя дакументы".

На мужчын звярнулі ўвагу міліцыянеры, якія знаходзіліся ў пашпартным стале. Яны выклікалі нарад. Так Швядкоў і Купчын трапілі ў аддзяленне. А там усё і пачалося:

"Мы пачалі даказваць свае правы, пытацца, на якой падставе нас затрымалі. Ну і нас пачалі проста біць. Спярша паставілі да сцяны, потым паклалі на падлогу і пачалі збіваць. Лёшка [Швядкоў. — Еўрарадыё] тады закрычаў, што калі яны не перастануць, то ён выкліча пракуратуру. Яму прыгразілі: што, і ты хочаш?" — працягвае Купчын.

Пасля збіцця ў Купчына быў зламаны левы каленны сустаў, прыйшлося звяртацца да дактароў.

Правіннасць малодшага лейтэнанта

Як пазней установіць следства, у гэтым эпізодзе вызначыўся малодшы лейтэнант міліцыі Мікалай Раеў. Амаль праз тры месяцы пасля інцыдэнту — 6 лютага 2019 года — ён быў звольнены з органаў унутраных спраў з фармулёўкай "за здзяйсненне правіннасці, перавышэнне службовых паўнамоцтваў і прымяненне гвалту ў дачыненні да затрыманых". А ўжо 18 лютага стала вядома, што па матэрыялах галоўнага ўпраўлення ўласнай бяспекі МУС па Магілёўскай вобласці распачата крымінальная справа.

Паводле інфармацыі з сайта УУС Магаблвыканкама, Мікалай Раеў усяго за два гады ад старшыны міліцыі і міліцыянера-кіроўцы аператыўна-дзяжурнай службы Мсціслаўскага РАУС даслужыўся да малодшага лейтэнанта і стаў участковым інспектарам міліцыі. Афіцэрскае званне ён атрымаў толькі за тыдзень да інцыдэнту, на ўрачыстасцях з нагоды Дня ўшанавання ветэранаў органаў унутраных спраў і ўнутраных войскаў.

У Горацкі суд справа былога міліцыянера Раева паступіла з абвінавачаннем па частцы 3 артыкула 426 Крымінальнага кодэкса "Перавышэнне ўлады або службовых паўнамоцтваў". 22 жніўня яго прысудзілі да трох гадоў калоніі. Хлопца пазбавілі звання малодшага лейтэнанта і забаранілі яму на пяць гадоў працаваць у органах унутраных спраў. 

Касцяная нага

Швядкоў і Купчын расказваюць, што ніякай упэўненасці, што міліцыянера атрымаецца прыцягнуць да адказнасці, у іх не было.

Мікалай Раеў, на фота ён яшчэ прапаршчык / Сайт Мсціслаўскага раённага выканкама

"Калі з паліклінікі зніклі здымкі маёй нагі і амбулаторная карта, то я падумаў, што хочуць замяць справу. У судзе адвакат Раева запатрабавала паўторны здымак. Я, вядома, зрабіў. І яна такая: "На паўторным здымку пашкоджанняў няма". Вядома, няма, колькі ж ужо часу прайшло, больш за паўгода", — расказвае Купчын.

Пасля таго як Мікалаю Раеву далі тры гады калоніі, пацярпелыя супакоіліся.

"Я баяўся, што яму дадуць умоўнае ці хатні арышт які. Ці якая іншая замена. Але тут — крымінальны тэрмін. Прысуд абскарджваць не буду, задаволены і гэтым", — заяўляе Аляксей Швядкоў.

Адзін біў, сямёра трымалі?

Па словах пацярпелых, у збіцці ўдзельнічаў не толькі Раеў. Напрыклад, некалькі супрацоўнікаў РАУС трымалі іх. Але астатнія сем міліцыянераў праходзілі па справе толькі як сведкі:

"Нас трымалі па двое, хоць любы з работнікаў мог спыніць гэта ўсё. Мог не даць наносіць удары. Неяк спыніць Раева. Але ніхто гэтага не зрабіў. І ніхто не панёс пакарання за гэта, — кажа Швядкоў. — Я вельмі рады і спадзяюся, што ў Мсціслаўскім РАУС будзе праверка".

Пацярпелыя прысудам задаволеныя. Яны баяліся, што паколькі судзяць міліцыянера, то яму могуць даць умоўнае або і зусім замяць справу. Праўда, тры гады — найменшы тэрмін, якім можна пакараць за перавышэнне паўнамоцтваў, спалучанае з гвалтам.