Ці ёсць "рука Масквы"? Чаму ў Малдове ўспыхнулі пратэсты

Паліцыя прыбірае намётавы лагер / gagauzinfo.md

Намётавыя мястэчкі, пратэсты, сутыкненні з паліцыяй — вы маглі і не ведаць пра тое, што ўсё гэта гэтымі днямі адбываецца ў Кішынёве, але кадры адтуль выклікаюць "беларускія флэшбэкі". А чаму пратэстуюць малдаване? Еўрарадыё расказвае пра акцыі ў Малдове.
 

ЗаШОРаным позіркам

Аснова пратэстоўцаў — прыхільнікі партыі "Шор", створанай палітыкам Іланам Шорам. Гэты персанаж цікавы: некалькі гадоў таму яго абвінавацілі ў крадзяжы мільярда долараў з малдаўскіх банкаў, і ён нават атрымаў прысуд — але ў часе абскарджання змог схавацца за мяжу. Да самога спадара Шора мы яшчэ вернемся.

Пратэсты пачаліся амаль месяц таму — у дзень, калі прэзідэнт краіны Мая Санду паляцела ў Лондан удзельнічаць у пахаванні каралевы Лізаветы II. Мэты ўдзельнікі мітынгу не хавалі: яны патрабуюць адстаўкі ўрада і прэзідэнта, а таксама датэрміновых выбараў у парламент.

Галоўным трыгерам стаў рост цэн на газ. Шор пачаў раскручваць гэтую тэму сур'ёзна: яшчэ летам сябры яго партыі ляталі ў Маскву, а цяпер ён пачаў заяўляць, што Малдове трэба новы ўрад, здольны дамовіцца з Расіяй пра нізкія цэны.

З 18 верасня ў скверы перад малдаўскім парламентам быў усталяваны намётавы лагер. У нядзелі праводзіліся мітынгі, але сур'ёзнага развіцця падзей не было. Урад не рэагаваў на патрабаванні пратэстоўцаў, а Санду абвінаваціла ўдзельнікаў акцый у фінансаванні "з украдзенага Іланам Шорам з бюджэту мільярда долараў".

Таксама Санду заяўляла, што яе адстаўкі патрабуюць "зладзеі", якія супраціўляюцца рэформе юстыцыі.
 

Разагналі, але не да канца

Новы паварот у сюжэце з пратэстамі адбыўся ў апошнія выходныя: паліцыя разагнала намётавае мястэчка. Уся рэч у тым, што мітынг у нядзелю доўжыўся больш за чатыры гадзіны, а, як піша ZDG, Камісія па надзвычайных сітуацыях усталявала менавіта такі максімальны тэрмін для акцыі з блакаваннем дарог.

У выніку намётавы лагер разабралі, пасля сутыкненняў некалькіх чалавек затрымалі. На гэтым пратэст не скончыўся: проста людзі перабраліся ў парк каля Опернага тэатра.

Кадры адтуль разлятаюцца прыгожыя, асабліва па прапагандысцкіх тэлеграм-каналах: маўляў, вось вам і Еўропа. Ды толькі, як яшчэ ў верасні высветлілі журналісты, многім удзельнікам мітынгаў плацяць і ў Кішынёў іх літаральна прывозяць з іншых рэгіёнаў краіны.

Наўрад ці пратэсты на гэтым этапе падтрымлівае большасць малдаван. Прынамсі, у верасні рэйтынгі даверу яшчэ ўзначальвала Санду. Аднак на другім месцы быў арыштаваны экс-прэзідэнт Ігар Дадон, на трэцім — Шор. Апошнімі днямі Дадон усё часцей выступае ў падтрымку пратэстоўцаў. Так што гісторыя яшчэ не скончаная.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.