Мінчука адправілі ў калонію за абразлівыя жэсты ў бок міліцыянераў
Мінчука адправілі ў калонію за абразлівыя жэсты ў бок міліцыянераў. 25-гадовага Максіма Цішкевіча пакаралі за падзеі ночы з 9 на 10 жніўня 2020 года. Ён прызнаны вінаватым у "актыўным удзеле ў групавых дзеяннях, што груба парушалі грамадскі парадак" і асуджаны на 2 гады калоніі агульнага рэжыму.
Хлопец прызнаў віну. "На дарозе знаходзіўся і паказваў жэсты", — цытуе яго словы spring96.org.
Крымінальную справу разглядаў суд Цэнтральнага раёна, суддзя — Дзмітрый Карсюк.
Цішкевіч быў затрыманы 21 красавіка сёлета, з таго часу знаходзіцца за кратамі. На судзе ён сказаў, што хацеў зрабіць прапанову сваёй дзяўчыне, і ў сувязі з гэтым прасіў прызначыць пакаранне з адтэрміноўкай. Яму на сустрач не пайшлі.
