КДБ дадаў у "тэрарыстычны спіс" яшчэ сем чалавек

Камітэт дзяржаўнай бяспекі Беларусі абнавіў спіс "асоб, якія маюць дачыненне да тэрарыстычнай дзейнасці" — там з'явіліся прозвішчы яшчэ сямі чалавек, пішуць праваабаронцы.

"Тэрарыстам" прызналі Дзяніса Максімава. У кастрычніку яго асудзілі на 2 гады калоніі за каментар у інтэрнэце па "справе Андрэя Зельцэра". Максіма абвінавацілі ў абразе прадстаўніка ўлады і распальванні сацыяльнай варожасці. У "тэрарыстычны спіс" таксама дадалі Сцяпана Талкачова (яго таксама судзілі за каментар па "справе Зельцэра") і Івана Супрунчыка, які па версіі следства перадаваў "дэструктыўным каналам" інфармацыю пра сваяка-сілавіка.

Таксама ў спіс "асоб, якія маюць дачыненне да тэрарыстычнай дзейнасці" дадалі Ігара Хрыстафорава, Паўла Ганчарука, Сяргея Фісюка і ўжо другі раз Вольгу Цыбульскую. Па словах праваабаронцаў, жанчыну ўнеслі ў тэрарыстычны спіс яшчэ ў верасні, а цяпер прадублявалі.

На дадзены момант у "тэрарыстычным спісе" беларускага КДБ 958 чалавек, з іх 213 — беларусы.