Каранік зрабіў прагноз па COVID-19 у Беларусі
Уладзімір Каранік / З архіву БЕЛТА
Зараз COVID-19 хварэюць часцей, чым іншымі ВРВІ, сказаў былы міністр аховы здароўя, а цяпер кіраўнік Гродзенскага аблвыканкама Ўладзімір Каранік. Але ён разлічвае, што з часам сітуацыя зменіцца, і лекары часцей будуць мець справу са стандартнымі вірусамі.
"Вельмі спадзяемся, што ўздым каронавіруснай інфекцыі не працягнецца да лютага, і мы будзем бачыць у бліжэйшыя паўтара-два месяцы ўжо лічбы зніжэння захворвання", — сказаў Каранік у эфіры дзяржаўнага тэлебачання.
Штодзённы прырост хворых у апошнія дні складае каля 1000 чалавек. Напярэдадні Міністэрства аховы здароўя паведаміла пра 977 новых выпадкаў COVID-19. Да гэтага было 983 і 984. Гэта больш, чым фіксавалася вясной. Максімальная колькасць выяўленых выпадкаў за суткі вясной была 29 красавіка — 973 выпадкі.
Медыкі нагадваюць аб мерах засцярогі: неабходна насіць маскі, мыць рукі і карыстацца сродкамі дэзінфекцыі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
