"Гучала страшна, посуд затросся дома": што за выбух адбыўся ў Мінску?

4 студзеня жыхароў вуліц Скрыганава, Бірузова і Адоеўскага каля 7 раніцы пабудзіў гучны незразумелы выбух. "Гучала страшна, посуд затросся", — піша мінчук. Да абеду стала вядома, што прычына гэтага — успышка газапаветранай сумесі на складзе на Скрыганава, 39.

Ад выбуховай хвалі ў кватэрах у некаторых жыхароў комплексу "Каскад" з паліц упалі рэчы. У доме на Бірузова, 11 разбіта акно і сарваны пластыкавыя трубы з фасада будынка.

У рэдакцыю Еўрарадыё паведамілі, што выбух, хутчэй за ўсё, адбыўся на тэрыторыі ААТ "Белрэсурсы". Аднак у адміністрацыі прадпрыемства каментаваць гэту інфармацыю адмовіліся.

Каля 14:30 з'явілася афіцыйнае пацвярджэнне МНС пра ўспышку газапаветранай сумесі на тэрыторыі, арандаванай у "Белрэсурсаў":

— Праз успышку атрымаў траўмы загадчык фірмы-арандатара 1959 года нараджэння. Мужчына з апёкамі рук і твару звярнуўся па медыцынскую дапамогу на месцы здарэння, пасля аказання дапамогі адпушчаны дадому для амбулаторнага лячэння, — тлумачыць афіцыйны прадстаўнік МНС горада Мінска Вольга Мельчанка.

Прычына здарэння пакуль устанаўліваецца. Разгляданыя версіі — негерметычнасць запорнай арматуры газавага награвальніка і канструкцыйны недахоп награвальніка.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.