Green Pepper “Get On The Right Road”
Міне 10 гадоў, удзельнікі гурта Green Pepper вырастуць і, слухаючы свой дэбютны дыск “Get On The Right Road”, усміхнуцца: а тады падавалася, што гэта геніяльна!
Сапраўды, каманда Green Pepper мае ўсе магчымасці вырасці і ператварыцца ў добры калектыў . Па-першае, кожны яе ўдзельнік знаходзіцца на сваім месцы і ўмее граць. Па-другое, відаць, што слухаюць хлопцы шмат музыкі. Па-трэцяе, пры жаданні і таленце можна дасягнуць о-го-го якіх Алімпаў!
Прыемная баладнасць з драйвовымі ўкрапінамі Green Pepper нагадвае поп-рок -класіку пачатку 90-х: такое суцэльнае “All for love” Адамса-Сцюарта-Стынга ўскладненае драйвам, уласцівым гуртам “з Еўрабачання”. Не без фішак, вядома, уласна “пэпераўскіх”, аднак збольшага, музыка “Get On The Right Road” – дзень мінулы, пакуль ну ніяк не заўтрашні…
Кажуць, заходнія крытыкі вельмі станоўча ацанілі дэбютную працу Green Pepper (хацелася б пачытаць), а тамтэйшыя радыёстанцыі ўзялі песні з альбома ў сваю ратацыю (хацелася б паслухаць). О як! Тут жа чамусьці музыка “Пэпераў” каціць хутчэй як фон, чым арыгінальная асобна існуючая рэч. Добры, прафесійна зроблены, саладкаваты фон…
З боку піяру, Green Pepper правільна падыходзяць да справы, падаючы альбом геніяльным стварэннем нашага стагоддзя. Цытата старонкі гурта ў Сеціве: “Мы яшчэ маладыя, каб пісаць мемуары. А гісторыю нашага гурта будуць пісаць тыя, хто зараз побач з намі, тыя, хто пройдзе з намі цярністы шлях да музычнага Алімпу. Тыя, хто адчуў у нас вар’яцкую любоў да музыкі і жаданне ствараць… Біяграфія гурта пішацца на вашых вачах…” Гучыць пафасна і па-дзіцячаму амбітна, нездарма музыкам Green Pepper няма і 20.
Тым не менш, агульны складнік дэбютнага альбома “Пэпераў” радуе: усё прыгожа, роўна, прафесійна. Усё нібыта на месцы. Хлопцы маладыя. Можна смела пасылаць на “Еўрабачанне”. Адзінае, музыкам трэба навучыцца здзіўляць. Калі атрымаецца, цаны не будзе “зялёным перцам”.