Гомельскага камуніста і БРСМаўца затрымалі за падпіску на "экстрэмізм"

1 верасня валанцёры пошукава-выратавальнага атрада "Сімуран" абвясцілі аб пошуку 22-гадовага Аляксандра Лебедзева. Гэта настаўнік гомельскай школы №49, член БРСМ і камуністычнай партыі. Удзельнічае практычна ва ўсіх праўладных мерапрыемствах.

У міліцыі пацвердзілі "Сімуран" прапажу Аляксандра, але праз некалькі гадзін ратавальнікі напісалі, што чалавек знойдзены і жывы.

Пра прычыну знікнення Лебедзева "Флагштоку" распавёў яго знаёмы:

— Адбылася класічная жахлівая памылка — Аляксандр быў затрыманы міліцыяй і дастаўлены ў савецкае РАУС. Гэта было 31 жніўня ў другой палове дня. Прычынай затрымання стала падпіска на адзін з "экстрэмісцкіх" рэсурсаў. У міліцэйскім палоне Лебедзеў правёў ноч. На наступны дзень з палону яго выручылі бацькі.

Крыніца дадала, што ў "патрыятычнай" тусоўцы Лебедзева цяпер называюць "Сашка-бчбшнік".