Глеб: Канфлікту з Кандрацьевым і парушэння дысцыпліны не было

Як вядома, галоўны трэнер Георгій Кандрацьеў не выклікаў Аляксандра Глеба на матчы са зборнымі Украіны (9 кастрычніка) і Славакіі (12 кастрычніка). Украінскія інтэрнэт-выданні напісалі, што прычына ў адносінах гульца да каманднай дысцыпліны: захоча — прыедзе на базу, захоча — з'едзе. Сам Кандрацьеў сітуацыю не каментуе, адсюль і чуткі.

"Я ніколі самачынна з каманды не адлучаўся. Трызненне нейкае", — сказаў Аляксандр Глеб у інтэрв'ю газеце "Комсомольская правда в Беларуси". Ён абверг, што ў яго існуе канфлікт з Георгіем Кандрацьевым. Паводле Глеба, яны "не сварыліся і адносін не высвятлялі — нармальна кантактавалі". Футбаліст прызнае, што рашэнне галоўнага трэнера яго здзівіла, але ён прыняў яго "з разуменнем, таму што трэнер адказвае за вынік".  

У той жа час Аляксандр Глеб кажа, што калі ў будучыні яго ўсё ж выклічуць у зборную Беларусі, то ён прыедзе.