Генпракуратура знайшла ў продажы "сродак тэрарызму" — верталёт на радыёкіраванні
Верталёт на радыёкіраванні, ілюстрацыйнае фота / pixabay.com
На папулярнай інтэрнэт-пляцоўцы пракуратура Заводскага раёна Мінска выявіла абвестку аб продажы верталёта на радыёкіраванні.
Такую аб'яву палічылі парушэннем заканадаўства, бо падобныя авіямадэлі "могуць быць выкарыстаныя ў супрацьпраўных мэтах", заяўляе прэс-служба Генпракуратуры. У прыватнасці, на думку пракурораў, пры дапамозе верталёта зламыснікі могуць парушыць грамадскі парадак, садзейнічаць "экстрэмісцкай дзейнасці" і нават здзейсніць "акт тэрарызму".
Інтэрнэт-маркету вынеслі прадпісанне, у якім абавязалі выключыць магчымасць размяшчэння такіх абвестак у будучыні.
У Беларусі з 2023 года ўказам Лукашэнкі фізічным асобам забаранілі ўвозіць у краіну, выкарыстоўваць і захоўваць беспілотнікі, а таксама авіямадэлі.
