Экс-супрацоўніка “Мінаблаўтатранса” асудзілі на хатнюю “хімію”

Экс-супрацоўніка “Мінаблаўтатранса” асудзілі на хатнюю “хімію”

Былога намесніка начальніка аддзелу арганізацыі перавозак “Мінаблаўтатранс” асудзілі на тры гады хатняй “хіміі” за незаконнае атрыманне ўзнагароджання. Адпаведнае рашэнне 15 чэрвеня вынес суд Першамайскага раёна Мінска. Як паведамляе БЕЛТА, спачатку яму інкрымінавалі атрыманне хабару (ч. 1 арт. 430 КК), аднак затым перакваліфікавалі яго дзеянні паводле ч. 1,2 арт. 433 КК.

Мужчыну абвінавачвалі ў тым, што ён не меней за чатыры разы ўзяў грошы ад прадстаўнікоў перавозчыкаў за спрыяльнае вырашэнне пытанняў, якія ўваходзілі на той момант у яго кампетэнцыю. Узнагароджанне было за падрыхтоўку дакументаў для заключэння дамоваў на перавозку пасажыраў у прыгарадным кірунку.

Абвінавачанага прызналі вінаватым у прыняцці супрацоўнікам іншай дзяржаўнай арганізацыі, які не з’яўляецца службовай асобай, маёмасці, дадзенай яму за здзейсненае ў межах яго службовых паўнамоцтвах дзеянне на карысць асобы, якая дала такую маёмасць. Былога супрацоўніка “Мінаблаўтатранса” асудзілі на тры гады абмежавання волі без накіравання ў папраўчую ўстанову адкрытага тыпу, без пазбаўлення права займаць пэўныя пасады або займацца пэўнай дзейнасцю.

Фігурант гэтай справы сплаціў у прыбытак дзяржавы 3 357 рублёў, што адпавядае прыбытку, атрыманаму злачынным чынам. Прысуд не набыў моц і можа быць абскарджаны.

 

Апошнія навіны

Галоўнае

Выбар рэдакцыі