Экс-кіраўнік Адміністрацыі прэзідэнта стаў дырэктарам банка
Урал Латыпаў з сённяшняга дня з'яўляецца адным з трох незалежных дырэктараў у складзе назіральнага савета Альфа-Банка (Беларусь).
Як інфармуе партал tut.by, на гэтую пасаду Латыпаў зацверджаны рашэннем агульнага сходу акцыянераў банка.
Дарэчы, у Латыпава ёсць пэўны досвед у гэтай сферы. На пасадзе міністра замежных спраў Беларусі ён на працягу двух гадоў узначальваў назіральны савет Белзнешэканамбанка.
Латыпаў працаваў практычна дзесяць гадоў побач з Аляксандрам Лукашэнкам — у якасці памочніка, затым міністра замежных спраў, дзяржсакратара Савета Бяспекі. А потым ён быў кіраўніком Адміністрацыі прэзідэнта. Пасля сыходу з дзяржслужбы ў 2004 годзе Латыпаў падаўся ў бізнэс — быў старшынёй кансультатыўнага савета "Лукойл-Беларусь", узначальваў кампанію "Дырэкт Менеджмент", якая кіравала аб'ектамі нерухомасці ў Маскве.
Фота — tut.by
