Дзеля “Масакры” расійскі артыст вывучыў беларускую мову

У Брэсце ў рамках кінафестывалю “Лістапад” адбылася “Масакра”. Фільм адбыўся, таму што на яго прэм'ерны прагляд прыйшоў глядач. Абедзьве залы, і ў кінатэатры 1-га Мая, і ў “Беларусі”, былі поўныя. І абмеркаванне пацвердзіла напісанае на флаеры: Mаssаcre наша іншае кіно.



На прэм'еры ў Брэсце былі рэжысёр Андрэй Кудзіненка і актрыса Святлана Зелянкоўская. Святлана ад’язджала на здымкі, таму на абмеркаванне фільма не заставалася. Гаварыла амаль на хаду.

Святлана Зелянкоўская: "Мая дачка папрасілася паглядзець фільм яшчэ раз або купіць DVD. Там многа чароўнага, чаго багата ў казках. Любові многа. І Дзмітрый Мілер ёй спадабаўся. Гэта расейскі артыст. Адмыслова для гэтага фільма навучыўся беларускай мове і гаворыць лепш за некаторых беларускіх акцёраў".

Рэжысёр-пастаноўшчык Андрэй Кудзіненка патлумачыў, чаму “Масакра”: слова незацяганае, шмат каму незразумелае, таму містычнае, але і само па сабе пагрознае, бо азначае “разня”, таму прыдатнае на ролю сімвала беларускай гісторыі. Але гэта не клішэ.

Андрэй Кудзіненка: "Я раблю заўсёды іншыя фільмы ў розных жанрах. Трэба мяняцца. На “Масфільме” рабіў моладзевы праект, “Розыгрыш”, таксама ў Расіі зроблены незалежны артхаўс “Акупацыя. Містэрыі”.

Нагадаем, “Масакра” зробленая ў Беларусі на грошы студыі “Беларусьфільм” і апісвае падзеі на нашай зямлі ў ХІХ стагоддзі. У маёнтку графа Пазуркевіча разыгрываецца крывавая драма, замешаная на каханні.

Абмеркаванне ў кінатэатры “Беларусь” было раўналежным фільму.

Глядачка: "Мы разам з табой прайшлі Акадэмію мастацтваў…"

Андрэй Кудзіненка: "І дзіцячы сад..."

Глядачка: "Так, ад дзіцячага садка і да Акадэміі. Даўно цябе не бачыла і радая цяпер павіншаваць з тым, што зрабіў добры фільм, зрабіў лёгка. Мяркуючы па пытаннях і рэакцыі, фільм спадабаўся і нашаму, і малодшаму пакаленню. Брэстаўчане могуць ганарыцца такім земляком!"

Андрэй Кудзіненка ў Брэсце дома. У зале былі ягоныя бацька і маці, шмат аднакласнікаў, знаёмых. Вучыўся ён у школе №7 з паглыбленым вывучэннем нямецкай мовы. Гэтую мову “alles vergessen“, усё забыўся.

У Брэсце фільм пайшоў добра. Як будзе прадавацца далей?

Андрэй Кудзіненка: "Ёсць цяжкасць такая. “Беларусьфільм” прадаецца дрэнна. Цяжка ламаць стэрэатып. А што да фільма, то на яго выдаткавалі каля 5 мільярдаў беларускіх рублёў. На “Беларусьфільме” да 60 адсоткаў ідзе на падаткі. Для такога замаху ён малабюджэтны быў".

Паводле слоў Кудзіненкі, у планах зняць фільм па сцэнары Артура Клінава, “замешаным на Яне Баршчэўскім, Дастаеўскім і Караткевічу”. Фільм мае быць пра трагедыю царазабойства як трагедыю беларускай душы.