Як правесці выхадныя 21-23 лютага, раіць Аляксей Янукевіч

Аляксей Янукевіч даволі рэдка праводзіць вольны час дома. Лідару партыі БНФ даводзіцца шмат наведваць абсалютна розных грамадска-палітычных мерапрыемстваў. Пры гэтым, палітык імкнецца не прапускаць імпрэзы з беларускага нацыянальна арыентаванага культурнага жыцця. А калі з’яўляецца вольны час, то з задавальненнем наведвае тэатры (сярод любімых — “Купалаўскі”, “Беларускай драматургіі” ды “Оперы і балета”) ды клубныя канцэрты, калі гучыць блюз ці рок музыка.

Выходныя 21-23 лютага Аляксей Янукевіч не раіць наведваць нейкія яўна забаўляльныя мерапрыемствы з павагі да падзей, якія разгортваюцца ва Украіне.

“Калі ўсё ж выбірацца з дому, то, думаю, цэнтральнай імпрэзай гэтага week end можна сказаць канцэрт гурта Dzieciuki, — раіць суботнюю прэзентацыю дэбютнага альбома гарадзенцаў палітык. — У “Дзецюкоў” рэпертуар адпаведны бягучым настроям пераважнай большасці дэмакратычна і нацыянальна арыентаваных беларусаў. Ёсць песні і пра змаганне, і пра паўстанне Каліноўскага, пра ахвяры дзеля Радзімы... Ну і, насамрэч, проста цудоўныя тэксты ды цудоўная музыка”.

У якасці альтэрнатывы ў суботні вечар Аляксей раіць пастаноўку Тэатра беларускай драматургіі “Містэр Розыгрыш”.

“Гэтая пастаноўка не занадта сур’ёзная, не занадта камедыйная. Гэта такая пастаноўка пра чалавечае жыццё і ў якасці мерапрыемства на выхадныя таксама падыходзіць, — тлумачыць выбар палітык і зноў пераключаецца на канцэрты. — Калі казаць пра нядзелю, то ў клубе Doodah King адбудзецца канцэрт-трыб’ют AC/DC. Па-першае, мне падабаецца музыка гэтага гурта, а па-другое, трыб’ют будзе рабіць украінскі гурт”.

Калі наведаць кіно — даўняя мэта, то, зноў жа, з азіраннем на падзеі ва Украіне лідар партыі БНФ раіць паглядзець “Воўк з Уол-стрыт”. На думку палітыка, стужка вартая прагляду ды і вясёлай яе назваць нельга.

“Я быў на гэтым тыдні на адкрыцці выставы Ёнаса Даніляўскаса ў Нацыянальным мастацкім музеі, называецца яна “Кветкі для тых, хто любіць жыццё”. Насамрэч, мне вельмі спадабаліся працы, якія там выстаўленыя. Выстава будзе працаваць і ў суботу, і ў нядзелю, думаю, шаноўнае спадарства не пашкадуе, калі наведае гэтую экспазіцыю”.

Мерапрыемстваў, якія б выклікалі ў Аляксея Янукевіча рэзка адмоўныя эмоцыі, ён не знайшоў. Але прызнаўся, што ёсць пэўная катэгорыя месцаў, дзе ён пакуль не бываў і не плануе.

“Калі не бываў, то можа і памылковае ўяўленне, але месцы кшталту таго ж клуба Dozari ці мерапрыемствы падобнай скіраванасці мяне не прывабліваюць. Я не атрымліваю задавальнення, калі трапляю ў такія месцы, а таму не магу і людзям параіць хадзіць туды”.