Ці паб’юцца беларускія дэпутаты перад тэлекамерамі?

Сесіі Палаты прадстаўнікоў плануюць паказваць па тэлебачанні. Такую ідэю перад новай сесіяй агучвае старшыня Палаты прадстаўнікоў Уладзімір Андрэйчанка. Кіраўнік Інфармацыйнага ўпраўлення ніжняй палаты парламента Мікалай Ліс пацвярджае: тэлетрансляцыі будуць.

“Мы вядзём радыётрансляцыі і, верагодна, будзем весці і тэлетрансляцыі. Пакуль дакладнай канкрэтнай даты іх пачатку няма. Аб радыётрансляцыях мы дамаўляемся з Белтэлерадыёкампаніяй. Яны арганізоўваюць. Хутчэй за ўсё, яны ж будуць займацца і тэлетрансляцыямі”.

Практыка гэта для Беларусі не новая — у першай палове 1990-х на ўсю краіну паказвалі пасяджэнні Вярхоўнага савета. Трансляцыі тады карысталіся вялікай папулярнасцю, бо людзі маглі адсочваць, чым насамрэч займаецца іх абраннік, узгадвае дэпутат Вярхоўнага савета 12-га склікання Алег Трусаў.

“Гэта вельмі важна. Па-першае, выбаршчыкі заўсёды бачаць, ці ёсць іх дэпутат на сесіі, ці не гуляе недзе. А па-другое, мы мелі права зачытваць у прамым эфіры просьбы і звароты людзей. І ўрад павінен быў на іх адказваць. І гэта надзвычай важна, каб людзі бачылі свайго дэпутата. Тады ўсе ведалі свайго дэпутата ў твар!”

Трусаў узгадвае, што ў сваю бытнасць дэпутатам Вярхоўнага савета быў знаёмы з вялікай колькасцю людзей — дырэктарамі школ, крамаў, проста актыўнымі людзьмі.

“Мяне пазнавалі, ведалі ў твар”, — гаворыць ён. І наракае, што цяпер нават сам не зможа ўзгадаць прозвішча свайго дэпутата. У тое, што Палата прадстаўнікоў стане такой жа адкрытай для людзей, як некалі Вярхоўны савет, Трусаў не верыць.

“Я вось баюся, што гэта будзе прафанацыя. Пакажуць хвілін пяць з пачатку і канца сесіі. Не думаю, што ўсё будуць трансляваць”.

Пакуль у Беларусь толькі збіраюцца вярнуць дэпутатаў у тэлевізары, ва Украіне ўжо 14 гадоў працуе тэлеканал, дзе пастаянна транслююць паседжанні Вярхоўнай рады.

“У нас ёсць уласны тэлеканал. Называецца “Рада”. Там транслююць пасяджэнні, брыфінгі, прэс-канферэнцыі, пасяджэнні камітэтаў. Магчыма, не ўсе паседжанні, але па жаданні дэпутатаў іх паказваюць у прамым эфіры. А пасяджэнні парламента — усе заўсёды ідуць у жывой трансляцыі”, — расказваюць у прэс-службе ўкраінскага парламента.

І дадаюць, што іх тэлеканал не абдзелены ўвагай гледачоў. Не дзіўна, калі ўлічыць, якія відовішчныя кадры часам разыходзяцца з Вярхоўнай Рады Украіны. Асабліва напярэдадні важных палітычных падзей.

Беларускія дэпутаты наўрад ці будуць выглядаць на тэлеэкранах такімі ж экспрэсіўнымі, як іх украінскія калегі. Але пасля з’яўлення тэлетрансляцый з Палаты прадстаўнікоў мы хаця б зможам пабачыць, як яны насамрэч выглядаюць.

Фота - pixanews.com