Чаму раней затапляла Нямігу, а цяпер "плыве" Рэвалюцыйная?
За тыдзень нядаўна адрамантаваны пешаходны цэнтр Мінска затапіла тройчы. Прычым, калі раней традыцыйнай ахвярай непагадзі быў раён вуліцы Няміга, то цяпер у "Маленькую Венецыю" падчас ліўняў ператвараецца скрыжаванне вуліц Камсамольскай і Рэвалюцыйнай.
А яшчэ ў 2009 годзе выратавальнікам даводзілася на гумовых лодках эвакуіраваць з Нямігі людзей! Але з гэтай праблемай горад справіўся. Чаму адразу ж з'явіўся новы праблемны рэгіён?
Ва УП "Гаррамліўнясцёк", якое адказвае за 308 км мінскіх калектараў дыяметрам ад 1 да 2,9 метра, распавядаюць, што большасць падтапленняў у Мінску адбываецца ці з-за невялікага дыяметра адводных труб, якія не паспяваюць прапускаць ваду, ці з-за забітых лістотай і смеццем дажджапрыёмных калодзежаў. Пра тое, чаму кожны сур'ёзны дождж ператварае цэнтр Мінска ў басейн, Еўрарадыё паразмаўляла з дырэктарам УП "Гаррамліўнясцёк" Юрыем Субоціным.
Калектар "Няміга" быў перакрыты падчас будаўніцтва метро
Калі стаяць з боку Траецкага прадмесця і глядзець у бок плошчы Восьмага сакавіка на Дом мадэляў, відаць тры трубы. Раней гэта быў так званы калектар "Няміга", які выходзіў у раку Свіслач. Але калі будавалася метро, з улікам таго, што станцыя была вельмі высока паднятая, гэтыя трубы заглушылі, яны не дзейнічаюць. Ні кроплі вады туды не трапляе і адтуль не сцякае.
Цяпер яго функцыю выконвае калектар "Цэнтр". Для таго, каб перастала затапляць Нямігу, некалькі гадоў таму пабудавалі ўчастак калектара, які перахоплівае ваду, якая сцякае па праспекце Дзяржынскага, пачынаючы з Грушаўкі. Скід зрабілі ў на вуліцы Палявой [раён скрыжавання вуліцы Маякоўскага і Другога кальца. — Еўрарадыё].
Цяпер усё навокал у бетоне — вадзе няма куды падзецца
Што тычыцца Рэвалюцыйнай — яе як раней тапіла, так і будзе падтопліваць. Гэта адбываецца таму, што трубы, закапаныя пад гэтымі вуліцамі, маюць невялікія дыяметры, каля 500 мм. Пры гэтым іх усталёўка адбывалася яшчэ ў канцы 1940-х — пачатку 1950-х. Тады вуліцы ў цэнтры Мінска былі грунтовымі, там нешта расло, вада збіралася і нікуды не сыходзіла, а плошча вадазбору была меншай. Цяпер усё вакол у бетоне, плітцы, а зялёных зон няма — вадзе няма куды падзецца. Яна альбо выпараецца, альбо сцякае ў сетку дажджавой каналізацыі. З улікам таго, што выпараецца яна даволі павольна, то ў большай ступені трапляе ў каналізацыю, якая не можа з ёй справіцца.
Спецыяліст адзначае, што старыя трубы — не адзіная праблема
Пракласці нейкія дадатковыя сеткі ў цэнтры горада вельмі складана. "Раскопкі" там не правядзеш: усё добраўпарадкавана, заасфальтавана. Да ўсяго іншага пад зямлёй праходзіць вельмі шмат інжынерных сетак, у тым ліку, сілавых і тэлефонных. На плошчы ў пяць квадратных метраў можа размяшчацца каля паўтара дзясятка кабеляў. Праблема, у першую чаргу, у гэтым.
Ці ёсць выйсце? Можна разабраць добраўпарадкаваныя тэрыторыі — асфальтаваныя, выбрукаваныя пліткай. Арганізаваць нейкія газоны, зялёныя зоны, каб вада часткова паглыналася грунтам. Хоць гэта нас таксама ўжо не ўратуе, таму што такія плошчы, як спатрэбіліся б для рэалізацыі гэтага варыянту, перарабіць нерэальна.
"Наўрад ці там наогул можна нешта зрабіць"
Нягледзячы на разгубленасць прадстаўніка УП "Гаррамліўнясцёк", дырэктар КУП "Мінская спадчына" [Арганізацыя, якая выступае заказчыкам рэканструкцыі ў гістарычным цэнтры сталіцы. — Еўрарадыё] Аляксандр Кохан заявіў, што праблему падтапленняў на Рэвалюцыйнай плануецца вырашыць на працягу 2-3 тыдняў.
"Цяпер распрацоўваюцца праектныя рашэнні, якім чынам забяспечыць адвод вады, — заявіў ён у інтэрв'ю БелТА. — Задзейнічаныя ўсе эксплуатуючыя спецыялізаваныя і праектныя арганізацыі, рашэнне да канца тыдня павінна быць. Рэалізацыя — на працягу 2-3 тыдняў".
Адзін з прапанаваных варыянтаў — устаноўка дадатковых прымачоў для адводу вады ў бок вуліц Камсамольская і Няміга. "Сеткі чыстыя, знаходзяцца ў працаздольным стане, але не спраўляюцца з тым аб'ёмам вады, якая паступае падчас моцных ападкаў", — дадаў Аляксандр Кохан.
