“Бясплатная” тамаграфія абыходзіцца ў 550 тысяч
![“Бясплатная” тамаграфія абыходзіцца ў 550 тысяч](/sites/default/files/styles/gallery_main/public/2023-08/mrt1.jpg.webp?itok=01GJNUgD)
"Бясплатная" камп'ютарная тамаграфія абыходзіцца жанчыне з Брэста ў 550 тысяч рублёў. Столькі каштуе прэпарат, які трэба ўвесці перад працэдурай, апісвае выпадак брастаўчанка Аксана:
"Гэта з маёй маці здарыўся выпадак. Ёй доктар паведаміла, што для тамаграфіі трэба набыць дыск і прэпарат. Як высветлілася, ін'екцыя каштуе 550 тысяч за адну ампулу. У папярэдні раз ёй рабілі бясплатна, на іншым апараце", ― апісвае гісторыю Аксана.
Матывацыя лекараў такая: бясплатна колюць толькі тых, хто стаіць на ўліку. Калі пацыент лечыцца амбулаторна, але не стаіць на ўліку, то прэпарат набывае за свае грошы.
Міністэрства аховы здароўя гэта абвяргае. Калі ў чалавека ёсць накіраванне ці паказанні, абследаванне і ўкол робяцца бясплатна.
"Уся працэдура мусіць быць бясплатнай, калі гэта па накіраванні лекара, калі ёсць адпаведныя паказанні", ― тлумачаць у ведамстве.
Камп'ютарная тамаграфіяжывата ў Брэсце каштуе паўмільёна за працэдуру. Прыватныя цэнтры камп’ютарную тамаграфію не робяць наогул — манаполія.
Але чаму працэдура павінна быць платнай у краіне з бясплатнай медыцынай? Шукаем магчымасці зрабіць абследаванне за так.
"Дзе ў нас у краіне штосьці бясплатнае? Толькі платна! ― адказваюць у анкадыспансеры ў Бараўлянах, калі пытаемся пра бясплатную тамаграфію. ― У нас бясплатна толькі, калі ёсць анкадыягназ і чалавек ляжыць у нас і лечыцца, тады бясплатна камп'ютарная тамаграфія".
Атрымліваецца, бясплатна мяне абследуюць толькі тады, калі я ўжо хворы. А як жа выявіць захворванне на ранніх стадыях?
Раней, Еўрарадыё спрабавала прайсці абследаванне на мамографе. Гэтую працэдуру паўсюль прапаноўвалі толькі платна. Кошт — ад 80 тысяч.
![“Бясплатная” тамаграфія абыходзіцца ў 550 тысяч](/sites/default/files/styles/round_photo/public/paragraphs/round_photo/mamograff.jpg.webp?itok=M0Dys6VY)
Бясплатная медыцына: Усе мамографы ў раёне зламаліся
Чарга на мамаграфію — ад некалькіх дзён да месяца, і толькі ў тэленавінах — без праблем.
Але не здаёмся, спрабуем патрапіць,на МРТ ці КТ праз звычайную паліклініку.
"Вы можаце запісацца да неўролага, і ён вырашыць, ці даць вам накіраванне. Але платна — прасцей", ― адказваюць у 16-й сталічнай паліклініцы. Усё ж запісваемся на прыём да неўролага. Паспрабуем скарыстацца бясплатнай медыцынай, у нас жа сацыяльная краіна.
Па статыстыцы Міністэрства аховы здароўя Рэспублікі Беларусь ў 2014 годзе ў кабінетах рэнтгенаўскай камп’ютарнай тамаграфіі было праведзена 739 тысяч абследаванняў, пры гэтым працэдуру прайшлі 353 тысячы чалавек. Аналіз дзейнасці кабінетаў паказаў, што 48% ад агульнай колькасці пацыентаў, якія прайшлі абследаванне, складаюць стацыянарныя, 52% — амбулаторныя, 12% прайшлі абследаванне платна.
Камп'ютарная тамаграфія - метад дыягностыкі пры дапамозе рэнтгенаўскага выпраменьвання.
Фота: omr.by, medicineno.com