Бузоўскі: Пытанне зносу Асмалоўкі пакуль не стаіць
![Бузоўскі: Пытанне зносу Асмалоўкі пакуль не стаіць](/sites/default/files/styles/gallery_main/public/2023-08/asmm.jpg.webp?itok=cI59mn-f)
Канчатковае рашэнне па мінскім мікрараёне Асмалоўка пакуль не прынятае, паколькі дэтальны план у чарговы раз накіраваны на дапрацоўку. Пра гэта ў размове з карэспандэнтам Еўрарадыё паведаміў старшыня Адміністрацыі Цэнтральнага раёна Ігар Бузоўскі.
“Калі пытанне аб зносе або будаўніцтве на тэрыторыі Асмалоўкі падымецца зноў, пра гэта ва ўстаноўленым парадку даведаюцца прадстаўнікі і жыхары мікрараёна, — абяцае ён. — Потым у чарговы раз пройдуць грамадскія абмеркаванні, але пакуль пытанне зносу не стаіць”.
Асмалоўка — раён у цэнтры Мінска, пабудаваны пасля Другой сусветнай вайны для кіруючай эліты краіны. Гарадскія ўлады планавалі знесці старыя дамы, але жыхары змагаюцца за прызнанне забудовы ў межах вуліц Багдановіча—Кісялёва—Куйбышава—Камуністычнай гісторыка-культурнай каштоўнасцю.