Беларусы ў Германіі скралі вінтоўкі і схавалі ў сабачых фекаліях

У Германіі арыштавалі двух грамадзян Беларусі ў сувязі з крадзяжом 40 вінтовак, піша Bild.

Вінтоўкі былі зробленыя ў Кітаі і дастаўленыя ў порт Гамбурга. Кантэйнер са зброяй пагрузілі на таварны цягнік, які мусіў адправіцца ў Баварыю. Аднак у выходныя ён застаўся на чыгунцы ў Машэне — мяркуючы па ўсім, без усялякай аховы.

Зламыснікі выявілі цягнік і скралі 40 вінтовак тыпу М16. Зброю, спакаваную ў скрынкі, яны закапалі ў лесе і замаскавалі гэтае месца сабачымі фекаліямі.

Пасля гэтага зламыснікі пакінулі Германію і выставілі скрадзеную зброю на продаж у даркнэце.

Службовы сабака ўнюхаў пальчаткі, якія злодзеі пакінулі каля месца злачынства, а з дапамогай дрона з паветра ўдалося знайсці і схованку. Следчыя пакінулі яе ў спакоі і пачалі назіранне. Праз два тыдні зламыснікі з'явіліся да схованкі, каб забраць зброю. Там іх і затрымалі. На допыце яны захоўвалі маўчанне.