Апублікаваныя доказы, што драўніну з РБ вязуць у ЕС пад выглядам казахстанскай
![Санкцыі лёгка абыходяцца](/sites/default/files/styles/gallery_main/public/2024-03/dgzljybm2uactyg3v8ty.jpg.webp?itok=XJa7i2la)
Санкцыі лёгка абыходяцца / investigatebel.org
Апублікаваныя доказы, што драўніну з Беларусі ў абыход санкцый вязуць у ЕС пад выглядам казахстанскай. Польскія мытнікі кажуць, што не маюць фізічнай магчымасці правяраць сапраўднасць усіх мытных дэкларацый. Пра гэта распавядаюць журналісты ў сумесным расследаванні Беларускага расследавальніцкага цэнтра, праекта ўкраінскай рэдакцыі "Радыё Свабода" "Схемы" і польскага перыёдыка Gazeta Wyborcza.
Еўрастат сведчыць, што ў 2022 годзе з Казахстана завезлі ў ЕС тавараў з дрэва на 14 мільёнаў еўра. У 2023-м гэты імпарт вырас у пяць разоў — да 68 млн еўра. Аўтары расследавання прааналізавалі кантракт кампаній Nurr-electro (Казахстан) і PLRBL (Польшча). Высветлілася, што подпісы і адбіткі пячатак на дакуменце казахстанскай Nurr-electro сфальсіфікаваныя. Эксперты засведчылі, што выкарыстоўваўся фотарэдактар. У згаданай кампаіі паведамілі, што "не было фінансавых аперацый па такім пагадненні, не тое што тавару". Ды і пячатка аказалася фальшыўкай.
А прадстаўнік беларускай кампаніі-перавозчыка прызнаўся, што тавар прывезлі з Беларусі. Ён згадаў беларускую кампанію ТАА "СО РБЛ", са склада якой яго забіралі. Яе ўладальнік Алег Яновіч з'яўляецца старшынём праўлення польскай PLRBL. Яновіч нервова ўспрыняў пытанні журналістаў і заявіў, што нібыта ў Польшчы не працуе.
Тая ж PLRBL заключала дамовы на пастаўку драўніны з Кыргызстана на 15 млн еўра. Геаграфія паставак шырокая: Польшча, Літва, Латвія, Славенія, Венгрыя, Францыя, Германія, Бельгія, Чэхія, Эстонія. У здзелках, якія выглядаюць як схемы абыходу санкцый для пастаўкі драўніны з Беларусі, маглі быць задзейнічаныя фірмы-пасярэднікі.
Па згаданых фактах МУС Польшчы праводзіць праверку.
![Апублікаваныя доказы, што драўніну з РБ вязуць у ЕС пад выглядам казахстанскай](/sites/default/files/styles/default_image_paragraph/public/paragraphs/image/pSB38ZJAlABmKTB677ef.jpg.webp?itok=PZ57pzNr)
![Апублікаваныя доказы, што драўніну з РБ вязуць у ЕС пад выглядам казахстанскай](/sites/default/files/styles/default_image_paragraph/public/paragraphs/image/xoHW07z5jua945czAt64.jpg.webp?itok=1wQu65cz)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.