Адбыўся другі фестываль “Жывы Гук ON-line” (фотарэпартаж)

Нягледзячы на тое, што прыйшлося перанесці дзейства з "лесвіцы"якая усім спадабалася і летняй веранды “дворыку ЦДА” у больш цеснае памяшканне клуба “Т-34”, канцэрт усё ж адбыўся. Адбыўся не толькі на ўсеагульную радасць, на жаль сотняў маладых людзей, якія хацелі ў той вечар наведаць мерапрыемства. Тым не менш, тое, што адбывалася ўсярэдзіне “Т-34”, безумоўна нагадвала першы фэст: унікальная атмасфера жывога канцэрту і сяброўскай тусоўкі, якая, шчыльна напакаваўшыся ў залу, перамяшчалася то на вуліцу (перакурыць і падзяліцца ўражаннямі), то вярталася пасля невялікага перапынку да сцэны, каб пачуць выступ новай каманды.

Другі “Жывы Гук ON-line” і ў гэты раз выбраў па выніках кастынгу даволі паспяховыя і цікавыя гурты: Remissia, Batiskaf, Esprit, “зорак” мінулага фэсту МУТНАЕВОКА і хэдлайнер з Магілёва MAUZER.

Колькасць жадаючых патрапіць у клуб “Т-34” не памяншалася нават да канца мерапрыемства. Але да таго часу дзейства “Жывы Гук ON-line”, вырваўшыся са сцен невялікага памяшкання, ужо даўно захапіла ўсіх, хто гутарыў з сябрамі на вуліцы. Проста патусавацца падыходзілі новыя ўдзельнікі, а адмыслова выдадзеныя ахоўнікам “Т-34” лісточкі запаўняліся прозвішчамі і электроннымі адрасамі жадаючых забраніраваць квіток на наступны фэст. Дарэчы, трэці “Жывы Гук ON-line” не прымусіць сябе доўга чакаць і адбудзецца ўжо на працягу бліжэйшага месяца.