Загад "трымаць месцы ў рэзерве" ў клініках на мяжы з Украінай не адменены

Мінздароўя Беларусі абверг паведамленні, што ў прымежных рэгіёнах Беларусі праз хворых расійскіх вайскоўцаў у бальніцах няма месцаў / @minzdravbelarus
Мінздароўя Беларусі абверг паведамленні, што ў прымежных рэгіёнах Беларусі праз хворых расійскіх вайскоўцаў у бальніцах няма месцаў / @minzdravbelarus

Знайсці расійскіх вайскоўцаў у беларускіх клініках ў прымежных рэгіёнах журналістам Deutsche Welle не ўдалося. Лекар адной з клінік, размешчанай у райцэнтры ля мяжы з Украінай, распавяла журналістам, што каранавірусных пацыентаў у клініцы няшмат, а "пра расійскіх вайскоўцаў мы таксама чулі, але да нас яны не паступалі". Па словах медыка, яна мела стасункі з калегамі ў трох іншых бальніцах Брэсцкай вобласці, у іх расейскіх вайскоўцаў таксама няма. Пры гэтым лекар нагадала, што пасля пачатку вайны ў лютым 2022 года беларускім бальніцам, якія знаходзяцца побач з мяжой, было загадана трымаць месца ў рэзерве.

"Пра тое, што такі загад быў адменены, нам не паведамлялі, і я цалкам дапускаю, што таму і пакідаюць койкі свабоднымі", — адзначыла лекар.


Іншы суразмоўца Deutsche Welle — медработнік з больніцы ў Бабруйску — распавёў, што да іх у клініку прыязджала камісія з удзелам вайскоўцаў. Абмяркоўвалі магчымасць вызваліць частку ложкаў "на выпадак паступлення параненых". Выданне адзначае, што побач з Бабруйскім знаходзіцца палігон "Асіповіцкі". Менавіта там, па інфармацыі беларускіх незалежных СМІ, праходзяць навучанне мабілізаваныя, якія прыбылі з Расіі.

Нагадаем, у пачатку тыдня Генштаб УСУ ў сваёй зводцы паведамляў, што ў Брэсцкай вобласці, асабліва ў раёнах, дзе знаходзяцца расійскія вайскоўцы, "значна узмацняецца сацыяльнае напружанне". Па версіі ўкраінскага Генштаба, гэта адбываецца праз тое, што мясцовыя бальніцы перагружаныя працай з расійскімі вайскоўцамі, якія "масава хварэюць праз нездавальняючыя умовы ўтрымання ў намётавых гарадках". У выніку лекары вымушаныя адмаўляць у лячэнні грамадзянам Беларусі. Міністр аховы здароўя Беларусі Дзмітрый Піневіч пазней абвяргаў гэтыя сцвярджэнні. Заявіў, што "ў нас пустуюць койкі ва ўсіх рэгіёнах".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі