Вольга Бандарэнка: Лідэраў Плошчы хочуць адлучыць ад моладзі
Яшчэ чатыром палітвязням КДБ змякчыла абвінавачанне. Гэта Зміцер Бандарэнка, Ірына Халіп, Сяргей Марцалеў і Павел Севярынец.
Іх цяпер таксама вінавацяць не ў масавых беспарадках, а ў дзеянях, якія парушаюць грамадскі парадак. Праваабаронца Алена Танкачова, аднак, не спяшаецца уздыхаць з палёгкай.
Танкачова: "На сённяшні дзень мы маем інфармацыю, што для 9 чалавек змененна абвінавачванне. Я б не спяшалася казаць, што абвінавачванні сталі больш мяккімі. Пра гэта можна будзе казаць, калі скончацца суды і можна будзе даследаваць у судовым парадку ўсе матэрыялы. І тады будзе бачна, чым сканчваюцца гэтыя працэсы".
На думку Танкачовай, следства сутыкнулася з сур’ёзнымі праблемамі, калі спрабавала даказаць арганізацыю масавых беспарадкаў. Менавіта таму абвінавачаным пачалі пераглядаць абвінавачанні.
Жонка Змітра Бандарэнкі Вольга мае крыху іншую думку:
Бандарэнка: "Відаць, Лукашэнка сказаў: "Да святаў". І ўсе сказалі: "Ёсць!" І хутка выконваюць яго пажаданне. Чаму змякчэнне ідзе? Бо з эканомікай у краіне не ўсё добра — гэта першае меркаванне. А другое — што, магчыма, лідэрам хочуць даць мякчэйшыя прысуды, а моладзь "добра" асудзілі. Каб увесці такі раскол, каб моладзь баялася..."
Нагадаем, што жорсткія прысуды за Плошчу ўжо атрымалі Васіль Парфянкоў, Аляксандр Атрошчанкаў, Мікіта Ліхавід. Іх звінавацілі ў тых самых масавых беспарадках, у якіх ужо не вінавацяць лідэраў. Ці змогуць асуджаныя абскардзіць папярэднія рашэнні? Танкачова адказвае асцярожна:
Танкачова: "Вельмі складана адказваць на гэтае пытанне. Бо як у гэтай сітуацыі будзе паводзіць сябе беларуская судовая сістэма, можна толькі спрабаваць меркаваць".
У кожным разе, можна меркаваць, што "сюрпрызы" ў "справе 19 снежня" яшчэ не скончыліся.