"Вельмі трывожна": Барэль выказаўся пра карупцыйны скандал у Еўрапарламенце
![Чацвярых палітыкаў падазраюць у хабарніцтве, сярод іх — віцэ-прэзідэнт Еўрапарламента / фота ілюстрацыйнае, pixabay](/sites/default/files/styles/gallery_main/public/2023-08/coins-gb8daabcd5_1920.jpg.webp?itok=gqLoysFX)
Чацвярых палітыкаў падазраюць у хабарніцтве, сярод іх — віцэ-прэзідэнт Еўрапарламента / фота ілюстрацыйнае, pixabay
Вярхоўны прадстаўнік Еўрасаюза па замежных справах Жазэп Барэль назваў карупцыйны скандал у Еўрапарламенце "вельмі, вельмі трывожным", цытуе ВВС.
Буйны карупцыйны скандал пачаўся ў Еўрапарламенце, чацвёра палітыкаў затрыманыя. Сярод чыноўнікаў, якіх падазраюць у хабарніцтве, — адна з віцэ-прэзідэнтаў Еўрапарламента Ева Кайлі. Яе адхілілі ад выканання абавязкаў, піша ВВС.
Следства мяркуе, што неназваная дзяржава Персідскага заліва на працягу некалькіх месяцаў уплывала на эканамічныя і палітычныя рашэнні Еўрапарламента. СМІ пішуць, што хабар спрабаваў перадаваць Катар. Аднак прадстаўнік урада Катара ў каментары AFP адмаўляе абвінавачванні.
У пятніцу ў Бруселі прайшлі 16 ператрусаў. Усяго для допыту затрымалі шэсць чалавек, дваіх з іх адпусцілі. У рамках ператрусаў былі канфіскаваныя грашовыя сродкі на суму каля 600 тыс. еўра. У падазраваных таксама канфіскавалі кампутары і мабільныя тэлефоны.
Чатыры чалавекі былі арыштаваныя, ім выставілі абвінавачанні ва ўдзеле ў злачыннай арганізацыі, адмыванні грошай і карупцыі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.