Улады не вырашылі, ці будуць "адпускаць" кошты на цукар

Беларускія ўлады пакуль не вырашылі, ці будуць працягваць рэгуляваць кошты на цукар. Гэта вынікае з адказу першага віцэ-прэм'ера Дзмітрыя Крутога журналістам пасля выніковай калегіі Міністэрства антыманапольнага рэгулявання і гандлю (МАРГ).

"Лічыцца ўвесь сабекошт цалкам, экспартныя кантракты, пераглядаецца ўся структура продажаў. Разгляд будзе комплексным", — цытуе БЕЛТА адказ чыноўніка на пытанне, ці будзе разглядацца адмена такога рэгулявання.

Намеснік міністра МАРГ Андрэй Картун падкрэсліў, што рэгуляванне коштаў на цукар не вырашае цалкам праблемы эфектыўнасці яго творчасці ў Беларусі. Таксама гэта пагаршае паказчыкі работы айчыннай кандытарскай галіны пры выкарыстанні беларускага цукру. 

Напрыклад, канцэрн "Белдзяржхарчпрам" загадаў прадпрыемствам кандытарскай галіны браць толькі беларускі цукар і толькі ў канкрэтных пастаўшчыкоў. "У гэтых дзеяннях мы ўгледжваем парушэнне антыманапольнага заканадаўства, і адпаведнае папярэджанне МАРГ у адносінах канцэрна ўжо падрыхтавана", — дадаў Картун.

У Беларусі дзяржава (у асобе МАРГ) вызначае мінімальна дапушчальныя кошты на цукар і максімальна дапушчальную гандлёвую надбаўку. Апошняя пастанова на гэты конт набыла моц 1 студзеня 2020 года, яна разлічаная на 60 дзён. Да таго таксама дзейнічала падобная пастанова, прынятая ў кастрычніку 2019 года на 90 дзён.

У суседняй Расіі цукар таннейшы. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.