Уладальнік БЧБ-кебабнай з Ваўкавыска страціў бізнес і з сям'ёй паехаў у Германію
Ад ваўкавыскага "астраўка дэмакратыі" засталіся толькі фотаздымкі / Еўрарадыё
Уладальнік кебабнай з Ваўкавыска пазбавіўся бізнесу праз сваю грамадзянскую пазіцыю: ціск з боку чыноўнікаў вымусіў яго эміграваць у Германію.
За два гады да таго Аляксандр Навасад быў аблашчаны ўладамі і нават атрымаў субсідыю на развіццё бізнесу. А цяпер прадпрымальнік у няміласці.
"Пятачок дэмакратыі ў цэнтры Ваўкавыска"
Аляксандр Навасад па адукацыі эканаміст. У 2018 годзе ён напісаў бізнес-план кебабнай і прайшоў сумоўе ў гандлёвым аддзеле Ваўкавыскага райвыканкама. А потым звольніўся і папрасіў дапамогі па праграме садзейнічання беспрацоўным у арганізацыі прадпрымальніцкай дзейнасці. Камісія аднагалосна ўхваліла субсідыю ў 1000 долараў.
— Першы пункт адкрылі ў лістападзе 2018 года. Не ведаю, з якой прычыны, але адразу да мяне прыехалі з СТБ, знялі ролік пра тое, што ў малых гарадах развіваецца прадпрымальніцтва. Маўляў, усё выдатна, людзі добра жывуць. Потым яшчэ і ў мясцовай газеце напісалі артыкул, што дзякуючы дзяржаве развіваецца прадпрымальніцкая дзейнасць.
У свой павільён я ўклаў каля шасці тысяч долараў, і гэта не лічачы куплі самога павільёна, які ў 2018 годзе каштаваў дзевяць тысяч даляраў, — расказвае Аляксандр.
Пазней выйграў тэндар на другі пункт, у самым цэнтры горада. Паставіў павільён, які сам зрабіў. Атрымаў дазвол у райвыканкаме на афарбоўку — ён у мяне быў у бел-чырвона-белых колерах. У Ваўкавыску ўсе ведаюць маю пазіцыю, я адкрыта вывешваў БЧБ-сцяг — гэта не забаронена, гэта наша гістарычная сімволіка.
Шаверма, кава, хот-догі — усё было вельмі смачна, пакуль у траўні я не акрэдытаваўся ў ініцыятыўную групу Віктара Бабарыкі.
"Праверка без знойдзеных парушэнняў — дрэнная праверка"
З лістапада 2018 да лета 2020 года пытанняў да ўстаноў Аляксандра ў адміністрацыі Ваўкавыска не было.
— Па падатках не было пытанняў ні разу. У 2019 годзе прыходзіла адзін раз санстанцыя. У нас калі прыходзіць праверка і не знаходзіць парушэнняў — гэта дрэнная праверка. І ведаеце, як яны кажуць? "Ну вы ж разумееце, мы не можам сысці ад вас, каб не пакараць. Давайце што-небудзь вам напішам". Напісалі, што пры распакоўванні каўбасак не стаіць дата распакоўвання. Страшнае парушэнне. Выпісалі тады штраф.
Падчас прэзідэнцкай кампаніі 2020 года Аляксандр збіраў подпісы за Віктара Бабарыку і зарэгістраваўся назіральнікам на выбарчым участку. Гэта скончылася арыштам па артыкуле 23.4 КаАП — за непадпарадкаванне законнаму распараджэнню службовай асобы.
— Старшыня выбарчай камісіі выклікала на мяне міліцыю, маўляў, я перашкаджаў ёй працаваць. Хоць я не перашкаджаў, я быў назіральнікам і павінен быў прысутнічаць на ўчастку. Далі дзесяць сутак.
Тут жа трапіла пад раздачу БЧБ-кебабная
— Другога кастрычніка мне даслалі дамову аб спыненні арэнды. У гэты ж дзень прыйшла санстанцыя. Я зразумеў, што жыцця мне не дадуць. Далі штраф — 560 рублёў, і яшчэ намякнулі, што хутка прыйдзе падатковая, МНС і ўсе астатнія.
У дамове аб арэндзе зямельнага ўчастка быў прапісаны пункт пра тое, што Ваўкавыская камунальная гаспадарка можа на працягу месяца адабраць выдзеленую мне пляцоўку "для ўласных патрэб". Пятага лістапада ўсё канчаткова вывезлі, і цяпер на месцы павільёнчыка нічога няма.
Тое, што да Аляксандра прыходзілі з ваўкавыскага цэнтра гігіены і эпідэміялогіі з пастаяннымі праверкамі і "не давалі жыцця", у самім ЦГіЭ адмаўляюць.
— Гэта няпраўда, — адказваюць Еўрарадыё ў санстанцыі.
Аляксандру 42 гады, ён жанаты, у яго двое непаўналетніх дзяцей. 20 кастрычніка прадпрымальнік разам з сям'ёй паехаў у Германію і цяпер чакае палітычнага прытулку.
— На мяне завялі адміністрацыйную справу па артыкуле 17.1. А ў твар сказалі: "Ты ў нас змагаром не будзеш, гэта дробнае хуліганства. А далей пойдзеш па крымінале".
Вяртацца ў Беларусь мы не можам. Нам давялося кінуць бізнес: мне грамадскае харчаванне, а маёй жонцы бізнес па дзіцячым адзенні. Жонцы давялося закрыцца, таму што пачаліся праверкі: то санстанцыя, то няма сертыфікатаў. Жонка пытаецца, а дзе браць гэтыя сертыфікаты? Нам адказваюць: "Не ведаем". А як нам жыць?
Пакуль мы атрымліваем статус уцекачоў, дапамогі нам не даюць. Але мы тут на поўным забеспячэнні, нас кормяць, мы знаходзімся ў інтэрнаце ў добрых умовах. Чакаем, калі пацвердзіцца наш статус.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.