У выніку ДТЗ у Мінску загарэўся матацыкл

Аварыя з удзелам матацыкла адбылася напярэдадні позна ўвечары на Нямізе, паведамляе "Наша Ніва" са спасылкай на відавочцаў. Выданне публікуе відэа наступстваў ДТЗ. На кадрах відаць, што байк-удзельнік здарэння ляжыць на зямлі і гарыць адкрытым полымем.

Па словах відавочцы, меркаваным вінаватым ДТЗ быў малады мужчына, які вырашыў перабегчы дарогу ў неналежным месцы.

"Мы з матацыклістам стаялі разам каля святлафора пад мостам з боку Траецкага прадмесця. Загарэўся зялёны, матацыкл паехаў, набраў хуткасць", — распавядае сведка Максім.

Пешаход да таго моманту паспеў ужо перабегчы палову праезнай часткі вуліцы Няміга. Матацыкл, па словах Максіма, зачапіў пешахода, той "зрабіў сальта, упаў і страціў прытомнасць". Медыкі зафіксавалі пацярпеламу пешаходу шыю, наклалі шыну на нагу і забралі ў бальніцу.

Матацыкліст таксама пацярпеў пры падзенні. Па словах відавочцы, у яго была парваная вопратка, былі бачныя пашкоджанні, але ад шпіталізацыі ён адмовіўся.

У ДАІ пацвердзілі факт ДТЗ і ўдакладнілі, што пешаход "з відавочнымі прыкметамі алкагольнага ап'янення" пераходзіў праезную частку па-за пешаходным пераходам. Прэс-служба ДАІ апублікавала відэа самага моманту здарэння.

Яшчэ адна сур'ёзная аварыя адбылася напярэдадні на трасе М1 у Барысаўскім раёне. Лоб у лоб сутыкнуліся два легкавых аўтамабіля, загінулі тры чалавекі.

Паводле папярэдняй версіі, кіроўца Mercedes — 25-гадовая дзяўчына —  не справілася з кіраваннем і выехала на паласу сустрэчнага руху. Насустрач рухаўся аўтамабіль Ford, пазбегнуць сутыкнення не ўдалося.

У выніку "ад атрыманых траўмаў кіроўца, а таксама пасажыры аўтамабіля Ford памерлі на месцы", распавялі ў Следчым камітэце Беларусі. Кіроўца і пасажыр другога аўтамабіля — у бальніцы, іх забралі медыкі.

Барысаўскі РАСК узбудзіў у дачыненні да дзяўчыны, якая была за рулём Mercedes, крымінальная справа па ч. 3 арт. 317 КК РБ (парушэнне правілаў дарожнага руху, што пацягнула па неасцярожнасці смерць дзвюх і больш асоб).