У Вярхоўнай Радзе Украіны пракаментавалі адкліканне амбасадара з Беларусі

Украіна не можа падтрымліваць дыпламатычныя адносіны з дзяржавамі, якія прызнаюць "ЛДНР". Так патлумачылі ў парламенце краіны рашэнне афіцыйнага Кіева адклікаць пасла з Беларусі.

"Для Украіны абсалютна непрымальныя якія-небудзь афіцыйныя кантакты якой-небудзь дзяржавы з падкантрольнымі Расіі тэрарыстычнымі арганізацыямі "ДНР-ЛНР". Па сутнасці, "ДНР-ЛНР" з'яўляюцца тэрарыстычнымі інструментамі і фактычнымі органамі Расіі", — заявіў кіраўнік Камітэта Вярхоўнай рады Украіны па знешняй палітыцы і міжпарламенцкім супрацоўніцтве Аляксандр Мярэжка. Яго словы прыводзіць рэсурс "Зеркало".

Сустрэча Аляксандра Лукашэнкі з прадстаўніком акупацыйных уладаў так званай Данецкай рэспублікі Дзянісам Пушыліным "з'яўляецца наўмыснай правакацыяй на мяжы прызнання так званых ДНР-ЛНР", падкрэсліў Мярэжка. Нагадаем, сустрэча адбылася напярэдадні ў Мінску. Лукашэнка паабяцаў Пушыліну дапамогу ў аднаўленні рэгіёну. Пасля гэтага афіцыйны Кіеў адклікаў амбасадара Украіны ў Беларусі Ігара Кізіма для кансультацый. У МЗС Украіны сустрэчу Лукашэнкі з Пушыліным назвалі "чарговым і абуральным недружалюбным актам з боку Рэспублікі Беларусь, накіраваным на падтрымку дзяржавы-агрэсара РФ".

На афіцыйным узроўні Аляксандр Лукашэнка дагэтуль не прызнаваў так званыя"ЛДНР".