У Смалявіцкім раёне падчас следчага эксперыменту ўцёк 18-гадовы хлопец
Увечары 29 чэрвеня ў Смалявіцкім раёне падчас следчага эксперыменту ўцёк падазраваны — Уладзімір Слонім, піша ex-Press.by. Хлопцу 18 гадоў, ён жыхар Жодзіна. Яго прыкметы: кароткая стрыжка, апрануты ў карычневыя штаны і чорную куртку.
Увечары ў чацвер міліцыянты абыходзілі дамы ў Смалявіцкім раёне і апытвалі людзей. У сацсетках паведамлялася, што пры апытанні праваахоўнікі казалі, быццам на руцэ ўцекача застаўся бранзалет ад кайданкоў.
На пад'ездзе да Жодзіна і выездзе з горада супрацоўнікі дарожна-патрульнай службы даглядалі ўсе аўтамабілі. Відавочцы кажуць, што чарга з аўтамабіляў у абодва бакі расцягнулася на кіламетры, час чакання ў чарзе складаў да паўгадзіны, а то і больш.
Паводле інфармацыі tut.by, а 22-й гадзіне кардоны міліцыі каля Жодзіна былі знятыя. Ці ўдалося злавіць уцекача, не паведамляецца.
30 чэрвеня прэс-служба УУС Мінаблвыканкама паведаміла, што пошукі падазраванага працягваюцца.
