У Шчучыне памёр 32-гадовы намстаршыні райвыканкама, а іншы, магчыма, сядзіць
З сайта Шчучынскага райвыканкама зніклі фота двух намеснікаў старшыні. І гэта зусім не выпадковасць.
Як стала вядома Еўрарадыё, намеснік старшыні Шчучынскага райвыканкама па пытаннях эканомікі Дзмітрый Крывецкі нядаўна памёр. Яму было ўсяго 32 гады. Смерць чыноўніка нам пацвердзілі ў прыёмнай выканкама, але пра прычыны гаварыць не сталі.
Таксама з сайта выканкама знікла фота першага намесніка старшыні Анатоля Тодрыка. Па звестках, якія ў нас пакуль не атрымалася праверыць, ён затрыманы, прычым яшчэ ў пачатку года. У сацсетках ён з'яўляўся апошні раз 11 лютага, а яго суседзі расказалі, што сям'я па тым адрасе больш не жыве.
Крывецкага і Тодрыка прызначылі на пасады ў адзін дзень, на пачатку ліпеня 2020 года. То-бок крыху больш за год таму. На першым фота Дзмітрый Крывецкі (справа) разам са старшынёй райвыканкама Аляксеем Садоўскім.
