У Оршы судзілі рэцыдывіста, ад якога пацярпелі суддзя, пракурор і следчы
У Оршы судзілі рэцыдывіста, ад якога пацярпелі суддзя, пракурор і следчы. 37-гадовы мужчына, жыхар Дубровенскага раёна Віцебскай вобласці, прыдумляў гісторыі, якія абражалі гэтых службовых асоб. Раней ён неаднаразова трапляў за краты, у тым ліку і за забойства. На гэты раз яго злавілі на крадзяжы. Тут мужчына і пачаў прыдумляць факты, якіх насамрэч не было.
Як піша газета "СБ. Беларусь сегодня", спачатку зламыснік абвінаваціў пажылога суддзю ў інтымнай сувязі з дзяўчынай-пракурорам. Наступная гісторыя была прыдуманая пра следчага. Далей ён заявіў, што даваў хабар дзяржабвінаваўцу. Нават калі мужчыну асудзілі, ён працягваў паклёпнічаць на службовых асоб, пісаў у самыя разнастайныя інстанцыі. Як кажа пракурор Дубровенскага раёна Яўген Аўцын, адбыўся новы суд. У якасці пацярпелых ад дзеянняў рэцыдывіста на ім прысутнічалі суддзя, пракурор і следчы. За іх публічную абразу, за заведама непраўдзівае паведамленне пра хабар мужчына атрымаў 5 гадоў пазбаўлення волі. Яны дадаліся да 3 гадоў, якія ён атрымаў за крадзеж.
