Кітайскую традыцыйную медыцыну вырашылі развіваць у Оршы. Як піша газета "Витебский курьер", такое пагадненне падпісана паміж лякарняй традыцыйнай кітайскай медыцыны Хунду і гарадской лякарняй №2 Аршанскай цэнтральнай паліклінікі.
У рамках супрацы запланавана абнаўленне матэрыяльнай базы лякарні і "абмен досведам", а таксама адкрыццё аддзялення традыцыйнай кітайскай медыцыны. У будучыні такія аддзяленні могуць з'явіцца ва ўсіх паліклініках рэгіёну.
Традыцыйная кітайская медыцына — псеўданавуковая, яна грунтуецца не на доказах, а на метафізічных перадумовах. Аднак гэта не перашкаджае беларускім чыноўнікам займацца яе ўкараненнем у краіне, бо кітайскі бок дае за гэта грошы. Напрыклад, Рэспубліканскі цэнтр экспертыз і выпрабаванняў у ахове здароўя разглядае з кітайскімі партнёрамі магчымасць запуску ў Беларусі вытворчасці прэпаратаў "традыцыйнай медыцыны", гэта значыць гамеапатыі.
