Свіны грып вярнуўся ў Беларусь. Галоўны інфекцыяніст просіць не біць трывогу

16/12/2022 - 08:17

Дыстанцыяванне і вакцынацыя — самыя эфектыўныя спосабы зберагчы сябе ад любога віруса / ілюстрацыя The New Yorker

Дыстанцыяванне і вакцынацыя — самыя эфектыўныя спосабы зберагчы сябе ад любога віруса / ілюстрацыя The New Yorker

Уздым захворвання на ВРВІ і грып рэгіструецца ў Беларусі і многіх іншых краінах. Дзе-нідзе кажуць пра так званую "трыдэмію": калі адначасова "лютуюць" каранавірусы, вірусы грыпу і іншыя вострыя рэспіраторныя інфекцыі.

Сярод вірусаў грыпу, якія выяўляюць сёння ў Беларусі, дамінуе H1N1, распавяла журналістам загадчык лабараторыі грыпу і грыпападобных захворванняў РНПЦ эпідэміялогіі і мікрабіялогіі Наталля Шмялёва. Больш вядомы ён як "свіны грып" — яго пандэмія ў 2009-м прынесла медыкам ўсяго свету нямала клопату. Сёння цыркуляцыя штаму зноў выклікае асцярогі — але больш не ў дактароў, а ў беларусаў: ці варта пераймацца з нагоды "свінога грыпу"?

Гэта ўжо "наш" вірус

Галоўны інфекцыяніст Беларусі, прафесар Ігар Карпаў запэўнівае: сітуацыя 2009-га са свіным грыпам у краіне больш не паўторыцца. Больш за тое — ён заклікае не пераймацца і не "раздзімаць" гэтую тэму.

"Тое, што было ў 2009 годзе, гэта так званая пандэмічная існасць грыпу, выхад новага штаму. Свіны грып (маецца на ўвазе H1N1, каліфарнійскі грып) даўно страціў свой пандэмічны патэнцыял", — патлумачыў доктар.

Усяго з 1889 года было шэсць такіх пандэмій, самай працяглай была "іспанка", якая доўжылася 23 месяцы.

"Цяпер вірус грыпу H1N1 — "наш", звычайны, які цыркуляваў на працягу многіх гадоў. Яго даўно, дарэчы, не называюць свіным", — дадаў Карпаў.

Усяго ж цяпер у Паўночным паўшар'і цыркулююць чатыры штамы грыпу — выпушчаныя да гэтага сезону вакцыны паспяхова бароняць ад іх. Усе гэтыя вірусы — сезонныя. Небяспечных, пандэмічных, спецыялісты не рэгіструюць.

"Я б не стаў пужаць адно аднаго свіным грыпам", — адзначыў інфекцыяніст.

Вакцынацыя неабходная

Асабліва падчас "трыдэміі" актуальная вакцынацыя: па звестках беларускіх медыкаў, асобы, вакцынаваныя ад грыпу, хварэюць амаль у дзесяць разоў радзей. Гэта важна для груп рызыкі, бо сталыя людзі, дыябетыкі, людзі з імунадэфіцытам і цяжарныя могуць асабліва цяжка перанесці грып – у тым ліку са смяротным сыходам.

На днях у сваім Facebook пра сітуацыю з захворваннем напісаў іншы вядомы лекар-інфекцыяніст Мікіта Салавей. Ён падкрэсліў, што прышчапляцца можна і "ў сезон": так што і зараз вы можаце схадзіць і зрабіць прышчэпку ад грыпу. Важна зрабіць і рэвакцынацыю ад каранавіруса, калі прышчапляліся вы досыць даўно.

Вельмі важна своечасова звяртацца да дактароў і не займацца самалячэннем. Калі ў вас устойлівая высокая тэмпература, якая не збіваецца — выклікайце лекара. "Прапісваць" самім сабе лекі не варта, асабліва антыбіётыкі — яны не працуюць пры вірусах.