У Мінску затрыманы дырэктар "Гараўтамоста"
Павел Важнік / goravtomost.by
У Мінску затрыманы дырэктар "Гараўтамоста" Павел Важнік. Паводле інфармацыі Еўрарадыё, у яго дома і на працы адбыліся ператрусы. Чыноўніка падазраюць у атрыманні хабару.
Фота Важніка яшчэ не прыбралі з сайта прадпрыемства. Але ў прыёмнай, куды наш журналіст патэлефанаваў як прыватная асоба, яму адказалі, што цяпер ужо былога дырэктара там "няма" і "больш не будзе". Яго абавязкі выконвае яго першы намеснік Іван Шаланкевіч.
"Гараўтамост" прагрымеў на ўсю краіну 8 студзеня 2022 года, калі на Нямізе ў цэнтры Мінска абрынуўся пралёт аўтамабільнага моста. Яго пасля гэтага доўга рамантавалі, а крайнім у гісторыі стаў намеснік дырэктара "Гараўтамоста" Мікалай Дзядзюля.
