У Мінску паставяць самы маленькі ў краіне помнік

Самы маленькі ў Беларусі помнік плануецца паставіць у Мінску яшчэ да Новага года, паведамляюць "Мінск-Навіны". Размясціць яго хочуць на вуліцы Зыбіцкай, 6. 

Дзяніс Анцявічус і Яўген Мяцеліца вырашылі, што Мінску бракуе гарадскіх легендаў, якія ёсць у іншых мясцінах. 

Спярша ў хлопцаў было 19 варыянтаў помніка. У іх ліку — бутэрброд з "Цэнтральнага", венік як сімвал вельмі чыстага горада і нават пошук шчасця на дне шклянкі.

Аднак "фіналістамі" сталі тры праекты:

— беларускае эга;

— млын, які стаяў менавіта на месцы Зыбіцкай, 6 амаль два стагоддзі таму;

— пані Парнікель — кіраўніца гарадскога пансіёну для высакародных дзяўчат, які знаходзіўся на Зыбіцкай у XVIII стагоддзі. 

Аўтарам новай гарадской скульптуры стане Станіслаў Нікановіч. Прагаласаваць за ўпадабаны варыянт можна па спасылцы да 6 снежня.

"Пакуль ідзе галасаванне, я ўжо раблю накіды, каб адразу прыступіць да працы. Помнік будзе каля 15 см вышынёй. А часткай працы стане вялікае павелічальнае шкло. Мне трэба будзе, літаральна, падкоўваць блыху", — дзеліцца планамі скульптар.

Усталяваць помнік плануецца ў снежні.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.