У кінапракат выходзіць беларускамоўны фільм па апавяданні Васіля Быкава
Неўзабаве ў беларускі кінапракат выйдзе фільм "Народныя мсціўцы" паводле апавядання Васіля Быкава. Асаблівасць стужкі ў тым, што яна знятая па-беларуску — рэдкая для айчыннага кінематографу з'ява.
Рэжысёрам і аператарам фільма выступіў Аляксандр Меліхавец. Здымаць стужку ён пачаў яшчэ ў 2010 годзе, але праз адсутнасць фінансавання і адміністрацыйныя складанасці мусіў "замарозіць" праект.
Да працы над фільмам рэжысёр вярнуўся ў 2016 годзе. Грошы на яго завяршэнне Меліхавец сабраў на краўдфандынгавай платформе “Талака”. Сёлета фільм быў зняты, агучаны і можа быць прадстаўлены вялікай аўдыторыі.
Галоўныя ролі ў фільме выконваюць Дзмітрый Давідовіч, Арцём Курэнь, Ілля Ясінскі. Ролі другога плану — Канстанцін Воранаў, Паліна Дабравольская, Аляксандр Вафік.
