У Арменіі могуць закрыць бальніцу, у якой лечацца пацыенты з дыягназам ВІЧ
JamNews
Пад пытаннем лёс армянскага прэпарату "Арменікум", з'яўленне якога стала сенсацыяй і абяцала рэвалюцыю ў фармацэўтычным свеце. А клінічны цэнтр "Арменікум", у якім выкарыстоўвалі прэпарат, можа закрыцца. Гэтае пытанне абмяркоўваецца ў Камісіі па сацыяльных пытаннях і пытаннях аховы здароўя Грамадскага савета Арменіі. Мяркуючы па ўсім, у 2018 годзе дзяржава спыніць фінансаванне цэнтра "Арменікум".
Створаны ў 1998 годзе прэпарат "Арменікум" быў прадстаўлены ў якасці сродку для лячэння СНІД/ВІЧ, аднак эфектыўнасць яго аспрэчваецца.
Існуе некалькі разнавіднасцяў "Арменікуму": таблеткі, растворы для ін'екцый і мазь. Усе яны прадаюцца ў армянскіх аптэках, але паколькі няма афіцыйнай выразнай пазіцыі адносна эфектыўнасці прэпарату, ён не вельмі актыўна прызначаецца і выкарыстоўваецца.
Па словах кіраўніка клінічных паслуг цэнтра "Арменікум" Віялеты Саргсян, эфектыўнасць сродку за гэтыя гады назіралася не толькі ў паляпшэнні якасці жыцця носьбітаў ВІЧ і змякчэнні сімптомаў хваробы, але і пры лячэнні шэрагу хваробаў, якія суправаджаюцца імуннымі праблемамі.
Яна адзначыла, што станоўчае ўздзеянне гэтага сродку відавочнае пры лячэнні сістэмнай чырвонай ваўчанкі, віруснага гепатыту С, апёкаў пасля прамянёвай тэрапіі і пролежняў. А па словах генеральнага дырэктара цэнтра "Арменікум" Левона Геваргяна, дзякуючы прэпарату ўдалося выратаваць пацыентаў, заражаных вірусам Н1N1 (свіны грып).
Віялета Саргсян у адным са сваіх інтэрв'ю заявіла, што ускладзеныя на "Арменікум" надзеі апраўдаліся, і на падставе вынікаў клінічных выпрабаванняў прэпарат выкарыстоўваецца для лячэння людзей з дыягназам ВІЧ/СНІД:
"Хаця правядзенне клiнiчных выпрабаванняў, тым больш такіх, якія адпавядалі б міжнародным стандартам, у Арменіі, якая не вельмі развітая краіна, было звязанае з вялікімі цяжкасцямі і патрабавала сур'ёзных укладанняў, усё ж удалося правесці такія выпрабаванні, у выніку чаго прэпарат быў зарэгістраваны.
Пасля рэгістрацыі ў Арменіі клінічныя выпрабаванні праводзіліся ў шэрагу іншых краін, у прыватнасці, у Расіі. Пасля правядзення незалежных выпрабаванняў таксама была даказаная эфектыўнасць прэпарата для лячэння носьбітаў ВІЧ, і лекі былі зарэгістраваныя таксама ў Расіі, Беларусі, Украіне і шэрагу іншых краін".
Тым, хто скептычна ставіцца да эфектыўнасці прэпарата, кіраўніцтва клінічнага цэнтра "Арменікум" тлумачыць: ёсць захворванні, у выпадку якіх паняцці "лячэнне" і "аздараўленне" непрыдатныя. ВІЧ адносіцца да іх ліку. Але калі ў чалавека, заражанага ВІЧ, паляпшаюцца паказчыкі імунітэту, паляпшаецца якасць жыцця, адступаюць спадарожныя захворванні, гэта можна лічыць дасягненнем.
Армянскія медыя час ад часу публікуюць неафіцыйныя паведамленні і каментары пра тое, што супраць распаўсюду "Арменікуму" ў свеце змагаецца фармацэўтычная мафія.