Толькі 1% расіян звязваюць СССР з рэпрэсіямі і ГУЛАГам — апытанне
Пры гэтым кожны пяты расіянін не змог правільна расшыфраваць абрэвіятуру СССР / topcor.ru
Толькі 1% грамадзян Расіі звязваюць СССР з рэпрэсіямі, расстрэламі і ГУЛАГам, высветлілася падчас апытання УЦВГД, праведзенага ў рамках праекта "30 гадоў без СССР". Сярод людзей, якія так адказвалі, найбольш моладзі.
Пры гэтым самым галоўным адмоўным вобразам, які ўдзельнікі апытання звязалі з СССР, з'яўляецца дэфіцыт тавараў, чэргі ў крамах, талоны. Пра гэта ўзгадалі 5% расіян.
Разам з тым 21% апытаных заявілі, што Савецкі Саюз у іх асацыюецца з такімі паняццямі, як вера ў светлую будучыню, стабільнасць, спакой ці ўпэўненасць у заўтрашнім дні. Апытанне таксама выявіла, што амаль кожны пяты дарослы грамадзянін Расіі не ведае, як правільна расшыфроўваецца абрэвіятура СССР.
УЦВГД правёў апытанне 24 лістапада сярод 1,6 тысячы расіян ва ўзросце ад 18 гадоў.
