Тарыфы на камуналку будуць аднолькавымі па ўсёй краіне?

25 сакавіка ўсім жыхарам Беларусі павінны прыйсці квітанцыі на аплату камунальных паслуг па новых тарыфах. Такое даручэнне аблвыканкамам і Мінгарвыканкаму разам з “максімальна дапушчальнымі коштамі на камунальныя паслугі” прапісанае ва ўказе Аляксандра Лукашэнкі № 107 "Аб аплаце жыллёва-камунальных паслуг”.

Ужо 24 сакавіка жыхарам Магілёва рассылаюць жыроўкі, палічаныя менавіта па прапісаных ва ўказе тарыфах, не зважаючы на тое, што там указаныя не абавязковыя, а “максімальна дапушчальныя кошты на камунальныя паслугі”. У выніку ў Магілёве квартплата ў стандартнай двухпакаёвай кватэры, дзе прапісаныя тры чалавекі, стала меншай усяго на 12 723,9 рубля.

Каб паспець у вызначаны тэрмін, кіраўніцтва Магілёўскай вобласці нават наважваецца на парушэнне ўсталяванай працэдуры. Справа ў тым, што аблвыканкамы і Мінгарвыканкам мусяць спачатку апублікаваць сваё рашэнне па тарыфах, у якім вызначаць кошты на камунальныя паслугі па сваіх рэгіёнах. Пры гэтым такія рашэнні мусяць прайсці ўзгадненне з Міністэрствам эканомікі і Міністэрствам юстыцыі. І толькі пасля гэтага можна друкаваць жыроўкі.

“Там ва ўказе ёсць прамая норма — выставіць па тарыфах, прапісаных ва ўказе, — здзіўляе прачытаннем указа намеснік кіраўніка Магілёўскага аблвыканкама і дадае. — Наша рашэнне павезлі ў Мінюст на рэгістрацыю”.

Але ў дзень 25 сакавіка ў Мінюсце разглядаюцца толькі рашэнні Віцебскай, Гомельскай, Мінскай абласцей і Мінгарвыканкама. “Але вы ж разумееце, сітуацыя можа змяніцца ў любы момант”, — кажуць у прэс-службе міністэрства. То бок Магілёўская вобласць нават праз дзень пасля друкавання жыровак не падала сваё рашэнне па тарыфах на ўзгадненне. Але ў Мінюсце прававую ацэнку такім дзеянням не даюць і раяць спытацца ў Камітэта дзяржкантролю.

“Разумееце, у чым справа, яны ж толькі ўсё гэта зрабілі, — кажа кіраўнік упраўлення кантролю галіны гаспадаркі КДК Магілёўскай вобласці Дзмітрый Захараў. — Жыроўкі толькі прыйшлі, і мы цягам тыдня-двух будзем маніторыць сітуацыю. Нам дадзенае даручэнне. Будзем вывучаць і глядзець. Па ідэі, яны яшчэ нічога не выдалі, але я пакуль не валодаю дакладнай інфармацыяй”.

У Мінску жыроўкі будуць прыходзіць і ў выхадныя, і яшчэ на наступным тыдні. Абяцаюць, што да 29-га сакавіка ўсе жыхары сталіцы атрымаюць папяровыя квітанцыі. Але некаторыя раёны ўжо цяпер могуць аплачваць камуналку праз сістэму “Разлік”.

“Па меры таго, як завяршаецца апрацоўка дадзеных ЖРЭА і ЖКГ па канкрэтных раёнах, адбываецца і раздрукоўка, — каментуе прэс-сакратар Цэнтра высокіх тэхналогій Мінгарвыканкама Аляксандр Казлоў. — На сённяшні дзень ужо могуць аплачваць Ленінскі, Партызанскі, Кастрычніцкі і Цэнтральны раёны горада”.

Прычым, у адзіным разлікова-даведкавым цэнтры Мінгарвыканкама паведамляюць, што тарыфы на ЖКП узялі з указа кіраўніка краіны, не чакаючы ніякіх рашэнняў Мінгарвыканкама. Невялікія адрозненні па коштах у Мінскай вобласці, тут крыху меншы тарыф на перапрацоўку адкідаў. Увогуле, па інфармацыі Еўрардыё, усе вобласці ўсталявалі тыя кошты на камуналку, што прапісаныя ва ўказе. А значыць, мы будзем плаціць за паслугі аднолькава, незалежна ад таго, колькі рэальна каштуе падвод вады, газа, ды тая ж перапрацоўка ЦБА (раней тарыфы па краіне адрозніваліся). Ды і прычапіцца не будзе да чаго, гэта ж сам кіраўнік краіны месяц правяраў, узгадняў і ў выніку падпісаў… Таму не выключана, што ў наступным месяцы мы будзем зноў чакаць новых тарыфаў ды пераразліку папярэдніх жыровак.