Следчы камітэт пачаў крымінальную справу за гібель рабочага на "Беларуськаліі"
Салігорскі райаддзел Следчага камітэта пачаў крымінальную справу па факце парушэння правілаў бяспекі горных работ, што пацягнула па неасцярожнасці смерць чалавека. Пра гэта паведамляецца на сайце Следчага камітэта.
Інцыдэнт адбыўся ў другой палове дня 3 студзеня ў шахце ААТ "Беларуськалій". Як паведамляецца на сайце прадпрыемства, на 51-гадовага рабочага вычышчальнага забою Уладзіміра Штылёва зваліўся кавалак пароды.
Следча-аператыўная група спускалася ў шахту, каб агледзець месца здарэння, сабраць і зафіксаваць матэрыялы і сляды. Следчыя высвятляюць прычыны і ўмовы, якія спрыялі трагічнаму здарэнню. Праваахоўнікі забралі вытворчую і тэхнічную дакументацыю, якая рэгламентуе парадак правядзення канкрэтных відаў горных работ. Следства прызначыла экспертныя даследаванні, дапытваюцца сведкі здарэння.
