СААЗ зафіксавала першую смерць ад каранавіруса 2019-nCoV за межамі Кітая
![На Філіпінах людзі масава скупляюць медыцынскія маскі / Reuters](/sites/default/files/styles/gallery_main/public/2023-08/rts30895.jpg.webp?itok=517vJ1S3)
На Філіпінах людзі масава скупляюць медыцынскія маскі / Reuters
На Філіпінах памёр ад новага каранавіруса 2019-nCoV 44-гадовы пацыент з цяжкай формай пнеўманіі, які прыехаў з кітайскага Уханя. Пра гэта паведамілі ў філіпінскім офісе Сусветнай арганізацыі аховы здароўя.
Па даных мясцовых медыкаў, мужчына прыехаў з эпіцэнтра распаўсюджвання віруса 2019-nCoV 21 студзеня. Разам з ім прыехала 38-гадовая жанчына, якая цяпер знаходзіцца пад наглядам лекараў.
Афіцыйны прадстаўнік філіпінскага мінздароўя Франсіска Дзюк III распавёў, што за некалькі дзён да смерці стан пацыента з Уханя быў стабільным і з'явіліся прыкметы яго паляпшэння, але затым за суткі яму раптам пагоршала, і мужчына памёр.
Па апошніх звестках, ад новага каранавіруса 2019-nCoV памерла 305 чалавек, а паправіліся 340. Заражэнне 2019-nCoV пацверджана ў амаль 15 тысяч чалавек, пераважная большасць знаходзіцца ў Кітаі.
За межамі Кітая новы каранавірус выяўлены ў больш чым 100 чалавек у 23 краінах і тэрыторыях.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.