Са Смаленшчыны ў Беларусь вярнулі 15 тон ласасёвай ікры
Расіяне падазраюць, што ікра паходзіць з краін, якія трапілі пад расійскія санкцыі.
У пункце папярэдняга паведамлення "Красная Горка" на мяжы Беларусі і Смаленскай вобласці Расіі былі затрыманыя 15 тон ласасёвай ікры. Рассельгаснагляд загадаў вярнуць тавар пастаўшчыку — адкрытаму акцыянернаму таварыству "Белрыба", піша сайт smolensk-i.ru.
Расійскі бок спаслаўся на парушэнні ў ветэрынарным сертыфікаце. У ім не было ўказана, ці праводзілася экспертыза прадукту, з якой сыравіны ён зроблены і наколькі ён якасны і бяспечны для ўжывання ў ежу.
Супрацоўнікі Рассельгаснагляду адзначылі, што ААТ" Белрыба" атрымоўвае марожаную ікру з ЗША і Даніі. Пастаўкі з гэтых краін на тэрыторыю Расіі ўжо амаль год як забароненыя.
Таксама быў адзначаны нездавальняючы стан аўтамабіля, які перавозіў харчовыя прадукты.
Фота: smolensk-i.ru