"Рэйкавы партызан" з прастрэленымі каленямі не можа нармальна хадзіць

"Рэйкавы партызан" Віталь Мельнік, якому пры затрыманні прастрэлілі калені, дагэтуль не можа нармальна хадзіць. Пра гэта ён распавёў у лісце на волю, перадаюць праваабаронцы "Вясны".

"Я пакрысе папраўляюся, але без мыліц, шмат не прайсці — мышцы на правай назе не аднавіліся. Як я зразумеў ад мясцовых лекараў, яны плануюць мяне пасля суда адправіць зрабіць аперацыю", — піша мужчына.

Генпракуратура накіравала ў суд крымінальную справу на 40-гадовага "рэйкавага партызана". Віталя Мельніка вінавацяць у тым, што ў сакавіку 2022 года на чыгуначным перагоне Навасады-Барысаў ён нібыта падпаліў рэлейную шафу святлафора аўтаматычнага блакавання. Гэта вывела з ладу сістэму сігналізацыі.