За Пачобута заступілася кіраўніца еўрапейскай дыпламатыі Кэтрын Эштан
А таксама прэм'ер-міністр Польшчы Дональд Туск.
Эштан, у прыватнасці, заклікала беларускія ўлады спыніць пераслед актывістаў апазіцыі і незалежных СМІ. Яна адзначыла, што гэта не першае затрыманне журналіста, а абвінавачванні, выстаўленыя яму, упісваюцца ў агульную карціну пераследу апазіцыі і незалежных СМІ ў Беларусі. Эштан заклікае Мінск спыніць пераслед і дазволіць грамадзянам рэалізоўваць права на грамадскую і журналісцкую дзейнасць, перадае БелаПАН.
Туск заявіў, што за справай Пачобута сочаць польскія дыпламатычныя службы. Ён выказаў шкадаванне, што Польшча ў чарговы раз павінна ціснуць на рэжым Лукашэнкі ў сувязі з затрыманнем апазіцыянераў.
22 чэрвеня Туск абмеркаваў сітуацыю вакол Пачобута з канцлерам Нямеччыны Ангелай Меркель. Кіраўнік польскага кабінета разлічвае на эфектыўнасць размовы. Па яго словах, раней у падобных выпадках Беларусь саступала пад ціскам усяго ЕС і яго рэзкай крытыкі.
Нагадаем, што журналіста польскай "Газеты выборчай" Андрэя Пачобута затрымалі ў сябе дома ў Гродне 21 чэрвеня. На яго пачалі паўторную справу справу за паклёп на прэзідэнта. Журналісту пагражае да пяці гадоў пазбаўлення волі.