Спецслужбы цікавяцца сваякамі палітуцекача Уладзіміра Станкевіча
Два оперупаўнаважаныя, участковы і двое людзей у цывільным завіталі да стрыечнага брата магілёўскага палітуцекача.
Яны хочуць ведаць, дзе зараз знаходзіцца Уладзімір і чым ён займаецца. Вячаслаў Станкевіч кажа, што спецслужбы таксама неаднаразова тэлефанавалі яму і прымушалі да супрацы. У адваротным выпадку пагражалі праблемамі на працы.
Вячаслаў кажа, што ў інтэрнаце апячаталі пакой, дзе жыў яго стрыечны брат.
Пасля падзеяў 19 снежня актывіст магілёўскай сацыял-дэмакратычнай моладзі Уладзімір Станкевіч быў вымушаны з’ехаць у Чэхію. Там ён праз нейкі час атрымаў палітычны прытулак.
